İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 292 Hüküm no: 315 Orijinal metin no: [137-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çan damga tabirolunan Ceneviz kâğıdının satışının Yahudi kâğıtçılara mahsus olduğu Ehl-i İslâm kâğıdçılarıyla Yahûdî kâğıdçıları nizâmı Ma‘rûz, Ehl-i İslâm kâğıdçıları ile Yahûd tâifesi kâğıdçıları beynlerinde olan nizâ‘ları Çarşamba günü arz odasında huzûr-ı âlîlerinde rü’yet olundukda mukaddemâ Âsitâne’ye gelen Efrenç kâğıdını tâifeteyn-i mezbûreteyn [138] ma‘an iştirâ ve bey‘ ederler iken beynlerinde olan nizâ‘larını kat‘ için yazı kâğıdı dört hisse i‘tibârıyla bir hissesi Yahûdîlere tahsîs olunup onlar dahi meclis-i şer‘de kendi hisselerini her ne mikdâr ise her topunda birer para fâiz ile ehl-i İslâm kâğıdçılarına bey‘ ve haşebî ve çârçûbe envâ‘ını Yahûdîler müstakillen fürûht etmek üzere rızâlarıyla nizâm ve mûcebince hucec ve evâmir sâdır olduğundan yine bu sûretde nizâmları ibkā olunmak re’y buyrulmağla i‘lâm olunmuş idi. Bu def‘a ehl-i İslâm kâğıdçıları Yahûdîler yedinde bulunan Ceneviz kâğıdını yazı kâğıdıdır, hilâf-ı fermân Yahûdîler bey‘ ederler deyü tekrâr nizâ‘ etmeleriyle tarafeyn dâ‘îhâneye ihzâr ve meşâhir-i hattâtînden Rodosî İbrahim Efendi ve Taş Mektebli Mustafa Efendi ve İbrahim Namık Efendi ve Ebezâde Mehmed Said Efendi ve İmam Hüseyni Efendi da‘vet ve ihzâr etdikleri kâğıdlar irâet olundukda Ceneviz kâğıdı bilâ-amel kābil-i kitâbet olmayıp neşşâf ve redîdir deyü ittifâkları ve bin yüz otuz senesinde hattâtların kâğıdçılardan şikâyetleriyle sâdır olan fermân-ı âlîşânda mührecilere fî-i vaz‘ı münâsebetiyle yazı kâğıdının envâ‘ı ta‘dâd olundukda ay damga ve alem damga ve büyük ve orta İstanbul ve Şabat ve üç takyeli ve battal-ı İstanbul ve fıstık ve İstanbul ve telhîs kâğıdlarından mâ‘adâsı mezkûr olmadığı tekrâr Çarşamba günü tarafeyn muvâcehesinde zâhir ve haşebî ve beyaz ve siyâh çârçûbe kâğıdlarının fâizi Yahûdîlerin ma‘âşlarına kifâyet etmemekle lisânen sâdır olan fermân-ı âlîleriyle zikr olunan Ceneviz kâğıdının bey‘i Yahûd tâifesine tahsîs buyrulup çan damga ta‘bîr olunur kâğıd dahi bilâ-amel kitâbet ve tahrîre kābil olmayıp Ceneviz kâğıdı kumaşında olup ve hattâtlar yedinde olan fermânda dahi çan damga mezkûr olmamağla yazı kâğıdı envâ‘ından olmadığı zâhir olmağla onun dahi bey‘i Yahûdîlere tahsîs olundukda ma‘âşlarına medâr olup ve bundan sonra tarafeynin nizâ‘ları tama‘-ı hâmlarından nâşî olmağla mu‘ârazaları istimâ‘ olunmayıp ve bu sûretde cizye evrâkı ekseriyâ Ceneviz kâğıdı olmağla kâğıdçıbaşı yediyle Yahûdîlere mübâya‘a olunan kâğıdın her yüz akçesinde on beşer akçe noksân vermeğe ta‘ahhüd etmeleriyle ba‘de’l-yevm inkıtâ‘-ı nizâ‘ları için yedlerine tuğrâlı fermân-ı âlîşân i‘tâ buyrulmak bâbında emr ü fermân hazret-i men-lehü’l-emrindir. Fî 29 Rebî‘ülevvel sene 1180.