İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 293 Hüküm no: 316 Orijinal metin no: [138-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Matos v. Sahak’ın Haçador v. Avanis aleyhindeki alacak iddiasında anlaşma sağlanması Sulh Ma‘rûz, Mahmiye-i İslambol’da Şehzâdebaşı’nda kapamacı tâifesinden Matos v. Sahak meclis-i şer‘-i şerîf-i enverde işbu hâmilü’r-rakīm Haçador v. Avanis muvâcehesinde ikrâr ve takrîr-i kelâm edip iki sene mukaddem merkūm Haçador’a şerîk olmak vechile âhara bey‘ ve fâidesi beynimizde berâber olmak üzere malımdan üç bin yedi yüz elli guruş kıymetli kapamacı metâ‘ı verip ol dahi ahz ve âhara bey‘ etmekle târîh-i mezkûrdan beri gerek sermâyesini ve gerek hâsıla olan fâidesini vermemekle bundan akdem taleb ve da‘vâ eylediğimde ol dahi benim için nesne almadım ve bu husûsa dâir beynimizde aslâ mu‘âmele câriye olmadı deyü inkâr edip ve ben müdde‘âma ikāmet-i beyyine murâd etdiğimde merkūm Haçador dönüp benden üç bin yedi yüz elli guruşluk metâ‘ı aldım lâkin bazergânlara olan deynine emrinle verip husûs-ı mezkûrdan benim zimmetimi ibrâ etmiş idin deyü eylediği def‘i şer‘an mesmû‘a olmamağla ikrârı mûcebince edâsıyla merkūm Haçador ilzâm olunmuş idi. El-hâletü hâzihi beynimizde muslihûn tavassut edip beni merkūm Haçador ile da‘vâ-i mezkûremden bin yedi yüz guruş üzerine inşâ-yı akd-i sulh eylediklerinde ben dahi sulhu kabûl ve bedel-i sulh-ı mezkûr bin yedi yüz guruşun bin iki yüz guruş mukābelesinde zikr olunan mahâll-i merkūmda vâki‘ iki kepenk demir ...? dükkânında mevcûd gedik ta‘bîr olunur iki aded kapamacı âlâtını def‘ ve teslîm ve beş yüz guruşunu nakden edâ etmekle ben dahi kabûl ve tesellüm edip zikr olunan kapamacı metâ‘ına ve fâide-i ma‘lûmesine müte‘allıka âmme-i da‘vâ ve kâffe-i mutâlebât ve eymân ve muhâsamâtdan merkūm Haçador’un zimmetini ibrâ-i âmm-ı râfi‘ü’l-hısâm ile ibrâ ve iskāt eylediğimde ol dahi medfû‘ olan gedik ve nakd-i merkūm beş yüz guruşa müte‘allıka kezâlik âmme-i da‘vâdan benim zimmetimi ibrâ ve iskāt ve her birimiz ibrâyı kabûl ve husûs-ı mezkûrdan birbirimiz kıbelinde aslâ hakkımız bâkī kalmadı dediğini merkūm Haçador tasdîk etmeğin mâ-vaka‘a bi’t-taleb ketb olundu. Fî 19 Rebî‘ülevvel sene [1]180. [139] Şuhûdü’l-hâl: Mustafa b. Abdullah, Ahmed b. İbrahim, el-Hâc Mahmud b. el-Hâc Mehmed, Hallâç Mehmed b. el-Hâc Mehmed, Mustafa Usta b. Mehmed, el-Hâc Ahmed b. el-Hâc Mustafa, Mustafa Ağa b. el-Hâc Hüseyin. Ustabaşı Abram v. Serkiz, Bedros v. Donek, Ariton v. Norsis, ohan v. Kabril, Misail v. Kaluk, Anton v. Bedros, Karabet v. Bedros, Kigork v. David, Bedros v. David?