İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 294 Hüküm no: 317 Orijinal metin no: [139-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yumurtacı gediğinin, sahiplerine teslim olunması Yumurtacı dükkân gediğini teslîme tenbîh Ma‘rûz, Odunkapısı’nda mütemekkin Sarrâf Yagob ve şerîki Turfanda nâm zimmîler meclis-i şer‘-i şerîfde zikri âtî yumurtacı dükkânı âlâtına vâzı‘ü’l-yed olan Halil b. Yusuf ile terâfu‘larında Odunkapısı’nda vâki‘ Yumurtacı el-Hâc Osman b. Hasan’ın müsteciren sâkin olduğu ma‘lûmü’l-hudûd dükkânda mevcûd gedik ta‘bîr olunur Yumurtacı âlât-ı ma‘lûmesini mezbûr el-Hâc Osman bin yüz yetmiş sekiz senesi Muharremü’l-haramı gurresinde yedi yüz elli guruş semen-i makbûza şurût-ı müfsideden ârî bey‘iyle bey‘ ve biz dahi iştirâ eylediğimizden sonra yine mezbûr el-Hâc Osman’a i‘âde edip ikāmet etdirmiş idim. Hâlâ mezbûr el-Hâc Osman fevt olup âlât-ı ma‘lûmeyi biz zabt murâd eylediğimizde mezbûr Halil bi-gayrı hakkın vaz‘-ı yed eder, suâl olunup kasr-ı yedine tenbîh olunmak matlûbumuzdur deyü da‘vâ ve mezbûr Halil cevâbında zikr olunan âlâtı müteveffâ-yı mezbûr el-Hâc Osman’ın gāibetü ani’l-meclis olan veresesi bana îdâ‘ ve teslîm etmeleriyle verese-i mezbûre hâzır olmadıkça zimmiyân-ı mezbûrânın da‘vâ-i meşrûhaları mesmû‘a değildir deyü eylediği def‘ini bir vechile beyan ve isbâta kādir olmamağla müdde‘iyân-ı merkūmân müdde‘âlarını Yumurtacı esnâfından kethüdâ el-Hâc Ahmed ve el-Hâc Mehmed ve el-Hâc Hüseyin ve el-Hâc Süleyman ve sâir on sekiz nefer kimesneler şehâdetleriyle isbât etmeğin mûcebiyle verese-i mezbûrenin zuhûrunda da‘vâlarına mevkūfen âlât-ı mezkûreyi zimmiyân-ı merkūmâna teslîm için mezbûr Halil’e tenbîh olunduğu bi’l-iltimâs huzûr-ı âlîlerine i‘lâm olundu. Fî 23 Rebî‘ülevvel sene 1180.