İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 295 Hüküm no: 319 Orijinal metin no: [139-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mustafa’nın, Hacı Halil Vakfı Cabisi Mehmed Efendi aleyhindeki davasının reddedilmesi el-Hâc Halil Vakfı’nın cibâyet nizâ‘ı Ma‘rûz, Bâ-işâret-i aliyye sâdır olan fermân-ı âlîlerine imtisâlen zâtı mu‘arrefe sâhibe-i arzuhâl Âişe bt. Mustafa b. Yusuf dâ‘îhânede meclis-i şer‘-i hatîrde Şeyhülislâm-ı -sellemehü’s-selâm- hazretleri nezâret-i aliyyelerinde olan evkāfdan el-Hâc Halil Vakfı’nın meşrûtiyet üzere mütevellîsi el-Hâc Ali hâzır olduğu hâlde vakf-ı mezkûrun akçe vazîfe ile câbîsi olan Mehmed Efendi mahzarında vakf-ı mezkûrun tevliyeti vâkıfın vakfiye-i ma‘mûlün-bihâsında bana meşrûta ve âid iken mezbûr el-Hâc Ali üzerine etdirdiğinden mâ‘adâ ammim olup bundan akdem vefât eden el-Hâc Mehmed’in verâseti bana ve mezbûr Mehmed Efendi’ye ve verese-i sâiresine münhasıra olmağla ammim mezbûrun hâric-ez-defter terekesinden olmak üzere beş bin guruş kıymetli eşyâ ve nakidden hissemi mezbûr Mehmed Efendi’den da‘vâ ve bedel-i makbûz mukābelesinde sulh olup mezbûrun zimmetini ibrâ eylediğim esnâda mezbûr Mehmed Efendi bana dört akçe cibâyet vazîfesi vermek üzere va‘d etmekle vazîfe-i mev‘ûdemi taleb ederim deyü eylediği da‘vâsı şer‘an mesmû‘a olmadığından mâ‘adâ mütevellî-i mezbûrun yedinde olan vakfiyesine nazar olundukda gerek mezbûre Âişe’ye ve gerek babası mezbûre tevliyet kaydı olmayıp ve mezbûre Âişe bundan akdem yine Rikâb-ı müstetâba arzuhâl ve husûs-ı mezkûr için mütevellî-i mezbûr ile evkāf-ı mezkûre müfettişi mevâlî-i izâmdan Muradzâde es-Seyyid Ahmed Efendi dâ‘îleri huzûrunda murâfa‘a ve kezâlik da‘vâsı mesmû‘a olmadığını mütevellî-i mezbûrun yedinde olan i‘lâm-ı şer‘î nâtık olduğu ma‘lûm-ı devletleri buyruldukda emr ü fermân hazret-i men-lehü’l-emrindir. Fî 23 Rebî‘ülevvel sene 1180.