İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 296 Hüküm no: 321 Orijinal metin no: [140-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kartal Ekmekçisi Kirkor’un Gaspar’da olan alacağını kefili Avratpazarı Ekmekçisi Zakar’dan tahsil etmesi Cihet-i kefâleden 314 [guruş] Ma‘rûz, Arzuhâl eden Kartal Ekmekçisi Kirkor mahmiye-i İstanbul’da meclis-i şer‘-i hatîrde arzuhâlde mezkûr Avratpazarı Ekmekçisi Zakar v. Agob muvâcehesinde bundan akdem destgâhdârım olan Gaspar nâm zimmî zimmetinde âhara bey‘ ile istihlâk eylediği ekmek semeninden olan üç yüz on dört guruş ve bir rub‘ hisseme merkūm Zakar bi’l-emr ve’l-kabûl kefil ve zâmin olmağla kefâletine binâen meblağ-ı merkūmu taleb ederim deyü ba‘de’d-da‘vâ ve’l-istintâk merkūm Zakar cevâbında müdde‘î-i mesfûra cihet-i kefâlet-i mezkûreden meblağ-ı mezkûr üç yüz on dört guruş ve bir rub‘ deyni olduğunu ikrâr u i‘tirâf etmeğin mûcebiyle meblağ-ı mezkûrun bi-hükmi’l-kefâle edâsıyla merkūm Zakar şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 23 Rebî‘ülevvel sene [11]80.