İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 296 Hüküm no: 322 Orijinal metin no: [140-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha Hatun’un menzilinin üzerine ilave ettirdiği kısmın yıktırılması Keşf fî-Galata Ma‘rûz, Sâhibe-i arzuhâl es-Seyyid Abdullah b. Abdülbaki’nin mahrûse-i Galata’da Sultân Bâyezid mahâllesinde vâki‘ nezâret-i hazret-i Şeyhülislâmî’de olan evkāfdan Sinan Paşa Vakfı’ndan mutasarrıf olduğu menzilin sokak aşırı karşısında kâin nezâret-i dâ‘îlerinde olan evkāfdan Âişe Hatun Vakfı’ndan Şerîfe Saliha Hatun bt. es-Seyyid Osman tasarrufunda olan menzil üzerine mezbûre Şerîfe Saliha bu esnâda hilâf-ı emr-i âlî ve mugāyir-i nizâm bir oda ve bir sofa binâsıyla menzil-i mezbûrumun ziyâsını kat‘ eyledi deyü dâ‘îlerine ve evkāf müfettişi efendiye ve izzetlü voyvoda ağa kullarına hitâben husûs-ı mezbûru mi‘mâr ağa ma‘rifetiyle şer‘le ba‘de’l-mu‘âyene hilâf-ı emr-i âlî ve mugāyir-i nizâm harekete tasaddîsi var ise i‘lâm olunmak bâbında sâdır olan fermân-ı âlîlerine imtisâlen taraf-ı dâ‘îlerinden keşif nâibimiz es-Seyyid Halil Efendi ve evkāf müfettişi efendi dâ‘îleri tarafından Hayrullah Efendi ve Galata Voyvodası izzetlü Ağa tarafından Çukadâr el-Hâc Mustafa mahâll-i merkūma varıp hâssa mi‘mârlarından Abdullah ve İsmail Halîfeler ma‘rifetleriyle mu‘âyene ve keşf [141] ve misâha eylediklerinde kadîmî binâsı kadden on zirâ‘ ve dokuz parmak bulunup ve bu esnâda üzerine müceddeden zam ve ihdâs eylediği dahi üç zirâ‘ ve altı parmak bulunmağın bu bâbda emr-i âlî ne vechiledir deyü mi‘mârân-ı merkūmândan suâl eylediklerinde ehl-i İslâm sâkin olduğu menâzil on iki ve kefere sâkin olduğu menâzil on zirâ‘ olmak üzeredir deyü bi’l-müşâhede ihbâr eylemeleriyle menâzil-i mezbûr üzerine bu esnâda binâ ve ihdâs olunan ebniyenin fermân-ı âlîşân mûcebince bi’l-cümle hedm ü ref‘i iktizâ eylediğini mezbûrân dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 23 Ra sene [11]80.