İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 297 Hüküm no: 323 Orijinal metin no: [141-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahudi Ellezoğlu Yuda’nın hırsızlık dolayısıyla tecziyesi Ma‘rûz, İşbu kāimede merkūm Ellezoğlu Yuda Yahûdînin keyfiyet-i hâli sâdır olan fermân-ı âlîlerine imtisâlen Asesbaşı el-Hâc Hüseyin Ağa ve Subaşı Mustafa ve Zindan Kâtibleri es-Seyyid Feyzullah ve Halil ve Zindan Hasekisi Mehmed ve Zindan bekçileri Ömer ve İbrahim ve İsmail ile sâir vukūfu olan Zindan kurbünde berber Mehmed ve karındaşı Berber Mustafa ve Balat Subaşısı es-Seyyid Mustafa ve şerîki el-Hâc Ali ve Balat’da menzili olup Süleymaniye’de Attâr İbrahim ve Takyeci Hüseyin’den suâl olundukda sirka âdet-i müstemirresi olup ve hattâ bundan akdem sirka töhmetiyle bir def‘a dahi zindana vaz‘ ve hâzır bi’l-meclis Kapıkethüdâsı Ali’nin menzilinden eşyâ sirka edip ba‘dehû mezbûr Ali ile sirka eylediği eşyâ için musâlaha olduğu ve kāimede tafsîl olunduğu üzere bu def‘a ahz esnâsında zindan neferi Ali’ye âlet-i harbile itâ‘at eylemediğini muvâcehesinde ihbâr ve bu makūlelerin ta‘zîri re’y-i âlîlerine menût umûrdan olduğu ma‘lûm-ı devletleri buyruldukda emr ü fermân hazret-i men-lehü’l-emrindir. Fî 24 Ra sene 1180.