İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 298 Hüküm no: 324 Orijinal metin no: [141-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muaccelesi ödendikten sonra üç sene müddetle kirası ödenmeyen vakıf arsanın mütevelli tarafından başkasına kiraya verilebileceği Bâ-mühr-i muhâsebeci efendi Ma‘rûz, Fi’l-asl İslambol sâkinlerinden olup otuz seneden mütecâviz Tunus vilâyetinde olan Halil b. Hasan b. Ahmed tarafından vech-i âtî üzere vekâlet iddi‘â eden sâhib-i arzuhâl Süleyman meclis-i şer‘-i şerîf-i enverde İslambol kādıları efendiler hazerâtı nezâretlerinde olan Murad Efendi ve Mustafa Efendi Vakfı müstagallâtından Mimarsinan mahâllesinde vâki‘ ma‘lûmü’l-hudûd muhterik han arsasında dokuz hisse i‘tibârıyla iki hisseye vâzı‘ü’l-yed olan Ahmed Bey b. Seyfullah ile vakfeyn-i mezkûreyn mütevellîsi İsmail Efendi hâzır olduğu hâlde terâfu‘larında arsa-i mezkûrenin dokuz sehim i‘tibârıyla üç sehmi müvekkilim mezbûr Halil’in babası Hasan b. Ahmed’in üzerinde iken fevt oldukda müvekkilim mezbûr ile karındaşı Hüseyin ve kız karındaşı Zeyneb’e intikāl etmiş iken mezbûr Ahmed Bey fuzûlî vaz‘-ı yed eder deyü iddi‘â edip mezbûr Süleyman’ın evvelâ vekâlet-i meşrûhası sâbit olmadığından mâ‘adâ mezbûr Ahmed Bey’in yedinde olan mütevellî temessükü mantûkunca mezbûr Hasan’ın üzerinde iken fevt oldukda evlâdı mezbûrûna âdiyen intikāl edip lâkin mezbûr Halil Tunus’da olmağla müddet-i medîde hissesinin icâre-i müeccelesi taraf-ı vakfa edâ olunmamağla mütevellîsi yetmiş iki senesinde Mustafa b. Ali nâm kimesneye tefvîz ve ba‘dehû hâmiş-i temessükde olduğu minvâl üzere tedâvül-i eyâdî ile mezbûr Ahmed Bey’in üzerine geçip ve ibrâz eylediği fetvâ-yı şerîfede mu‘accelesi istîfâ olunup üç seneden beri ücret-i müeccelesi verilmeyen vakıf arsayı mütevellîsi âhara icâra kādir olduğu musarrah olmağın mezbûr Süleyman vech-i meşrûh üzere mu‘ârazadan men‘ olunmak iktizâ eylediği mahkeme-i muhâsebeden huzûr-ı âlîlerine i‘lâm olundu. Fî 21 Rebî‘ülevvel sene 1180.