İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 298 Hüküm no: 325 Orijinal metin no: [142-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’ya iftira ve hakaret eden Sipahi Mustafa’nın cezalandırılması (kazf) Hadd-i kazf Ma‘rûz, Davudpaşa kurbünde Bâyezid-i cedîd mahâllesinde sâkin zü‘amâdan mültezim Ahmed Ağa b. Abdullah meclis-i şer‘-i şerîfe ihzâr etdirdiği komşusu Sipâhî el-Hâc Mustafa b. Ahmed mahzarında mezbûr Mustafa bir gece mukaddem kubeyl-i işâda menzili kapısı önünde bana bi’l-muvâcehe kâfir ve kızılbaş ve zânî ve avrad kapadırsın deyü şetm ve kazf edip ve bana âr lâhık olmağla mûceb-i şer‘îsini taleb ederim deyü ba‘de’d-da‘vâ ve’l-inkâr müdde‘î-i mezbûr müdde‘âsına mahâlle-i mezbûrede sâkin el-Hâc Bekir b. Ahmed ve Ahmed b. Mehmed nâm kimesneleri ikāme, onlar dahi edâ-yı şehâdet etmeleriyle mahâllelerinden tezkiye için kıbel-i şer‘-i şerîfden Mehmed Emin Efendi irsâl, ol dahi mahâlle-i mezbûreye varıp tezkiye etdikde yirmi dokuz nefer mazbûtü’l-esâmi Müslimîn şâhidân-ı mezbûrânın kizb ile ma‘rûf olmayıp udûlden olduklarını ihbâr etmeleriyle şehâdetleri şer‘an makbûle oldukdan sonra mahâlle-i mezbûre ahâlîsinden İmam Süleyman Efendi ve Kasab İlyas vâ‘izi eş-Şeyh Hasan Efendi ve Nâilî Paşa Câmi‘ vâ‘izi diğer eş-Şeyh Hasan ve Bâyezid-i cedîd Câmi‘i hatîbi es-Seyyid Abdurrahman Efendi ve el-Hâc Ahmed ve el-Hâc Süleyman ve el-Hâc İbrahim ve Yemişçi es-Seyyid Musa ve Sipâhî el-Hâc Ömer ve Kayyûm el-Hâc Mehmed ve Ömer Ağa nâm on bir nefer sikātdan Müslimîn meclis-i şer‘-i şerîfe hâzirûn olup mezbûr Ahmed Ağa için muhsan ve zinâdan afîf olduğunu alâ-tarîkı’ş-şehâdet haber vermeleriyle mûcebiyle mezbûr Sipâhî el-Hâc Mustafa’ya mezbûr Ahmed Ağa’nın talebiyle şer‘an hadd-i kazf olan seksen değnek darbı lâzım geldiği huzûr-ı âlîlerine i‘lâm olundu. Fî 24 Rebî‘ülevvel sene 1180.