İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 299 Hüküm no: 326 Orijinal metin no: [142-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Komşularının şikâyette bulunduğu Sipahi Mustafa’nın mahalleden çıkarılması İhrâç, Ma‘rûz, Sâdır olan fermân-ı âlîlerine imtisâlen kıbel-i şer‘-i şerîfden Mehmed Emin Efendi dâ‘îleri irsâl, ol dahi sâhib-i arzuhâlin mahâllesi olan Davudpaşa kurbünde Bâyezid-i cedîd mahâllesine varıp İmam Süleyman Efendi ve eş-Şeyh Hasan Efendi ve eş-Şeyh Halil Efendi ve Hatîb es-Seyyid Abdurrahman Efendi ve diğer Süleyman Efendi ve Mustafa Efendi ve Ali Çavuş ve Ömer Çavuş ve Mustafa Çavuş ve Mehmed Çavuş ve Hasan Çavuş ve Mütevellî İbrahim Ağa ve el-Hâc Musa ve el-Hâc Mehmed ve Yorganî İsmail ve İbrahim Ağa ve diğer İbrahim Ağa ve Hasan Beşe ve Berber Tokâtî Ahmed Çelebi ve es-Seyyid Hüseyin ve Kahveci Ali Beşe ve Hüseyin Ağa ve Mustafa Çelebi ve Kahveci Mehmed Çelebi ve Kolancı Ali Ağa ve Halil Beşe ve Mehmed Ağa ve es-Seyyid Ahmed ve el-Hâc Süleyman Ağa’dan sâhib-i arzuhâlin keyfiyet-i hâlini suâl eyledikde mezbûr kendi hâlinde ırzıyla mukayyed ve hilâf-ı şer‘-i şerîf kimesneye vaz‘ u hareketi yokdur deyü hüsn-i hâlini ihbâr ve komşusu arzuhâlde mezkûr Sipâhî el-Hâc Mustafa için kendi hâlinde olmayıp hadîdü’l-lisân ve dil-âzâr olmağla kendinden emniyetimiz meslûb olmuşdur deyü sû-i hâlini ihbâr ve mahâlle-i mezbûreden ihrâcını iltimâs eylediklerinde ol dahi rızâsıyla mahâlle-i mezbûreden çıkıp mahâlle-i uhrâya nakle ta‘ahhüd eylediğini mezbûr dâ‘îleri mahâllinde tahrîr ve ma‘an mürsel ümenâ-yı şer‘le gelip alâ-vukū‘ihî inhâ eylediği bi’l-iltimâs huzûr-ı âlîlerine i‘lâm olundu. Fî 24 Rebî‘ülevvel sene 1180.