İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 303 Hüküm no: 332 Orijinal metin no: [144-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ortaköylü Bakkal Avram’ın Galata ve sair yerlerden un yarma denilen undan getirerek satmasına izin verilmemesi Ortaköy’e dakīk getirip bey‘ etmemeye ta‘ahhüd Ma‘rûz, Arzuhâl eden Ortaköylü Avram v. İlya Yahûdî dâ‘îhânede ihzâr etdirdiği Ortaköy ekmekçileri Agob ve Bağdisar nâm zimmîlerden ben İslambol’dan yarma ta‘bîr olunur iştirâ eylediğim dakīki karye-i mezbûreye getirip Yahûd tâifesine bey‘ murâd eylediğimde merkūmân beni men‘ ederler deyü teşekkî edip, lâkin merkūmânın yedlerinde olup ibrâz eyledikleri i‘lâm mantûkunca merkūm Avram ve şerîki Yoda Safer yirmi altıncı günü Galata Bâb Mahkemesi’nde Galata ve tevâbi‘i uncuları ile murâfa‘a olup merkūmân bakkāl olmalarıyla kendi kârlarına kanâ‘at etmeyip bâ-emr-i âlî memnû‘ olan âhar mahâllerden yarma ta‘bîr olunur un getirip dükkânlarında destgâh ve elek peydâ ve hilâf-ı nizâm-ı kadîm hareket etmeleriyle te’dîbleri lâzım olmuş iken fî-mâ-ba‘d bu misillü hareket etmemek üzere ta‘ahhüd eylediklerini ikrâr u i‘tirâf etmeğin fermân-ı âlîleri mûcebince bu misillü hilâf-ı nizâm-ı kadîm hareket etmemek üzere tenbîh olunduğu bi’l-iltimâs huzûr-ı âlîlerine i‘lâm olundu. Fî 26 Rebî‘ülevvel sene 1180.