İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 305 Hüküm no: 337 Orijinal metin no: [146-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Depremde zarar gören Çukur Han’ın yangına dayanıklı surette yeniden inşa ve tamir olunması Keşf-i Çukur Han Ma‘rûz, Bundan akdem sâdır olan fermân-ı âlîye imtisâlen kıbel-i şer‘den mürsel Ali Efendi ve bi’n-nefs Mimar Ağa kulları ve izzetlü Yeniçeri Ağası tarafından ta‘yîn olunan Yazıcı Ebubekir Efendi Mercan sûkunda vâki‘ Çukur Han demekle ma‘rûf hana varıp keşf ü mu‘âyene eylediklerinde han-ı mezkûr bir tarafdan ba‘zan Çukacılar mahzeni ve ba‘zan Perdahtçı Hanı ve bir tarafdan Mercan Hanı ve bir tarafdan Zağferancılar Hanı ve bir tarafdan tarîk-i âm ile mahdûd olup pûşîdesi kiremid sakflı elli altı odalı hanın ulyâsında kârgîr tonozlu olup tûlen altı arzen beş buçuk kadden dört zirâ‘ bir bâb kule oda münhedim olup mezkûr odanın önünde vâki‘ kadîmî ahşabdan mebnâ tûlen ve arzen altışar ve kadden üç zirâ‘ matbâh ve âbdesthâne ve kenîf ve yine tûlen beş buçuk, arzen iki zirâ‘ on sekiz parmak dehliz mahâlli dahi ba‘zan münhedim olmağla zikr olunan ebniyeye kemâ-fi’l-evvel ahşabdan ve mârrü’z-zikr oda dahi harîkden masûn olacak vechile kârgîr sûretinde sakfı ahşab ve etrâf duvarları Frengî ve kirpi saçak ile binâsına tenbîh olunmuş idi. Bu def‘a sâhib-i arzuhâl el-Hâc Hüseyin’in vech-i meşrûh üzere binâ olunduğu sûretde kimesneye zarârı olmadığı müte‘ayyin olmak için arzuhâliyle vârid olan fermân-ı âlîlerine imtisâlen kıbel-i şer‘den tekrâr Ali dâ‘îleri irsâl olunup ol dahi mi‘mâr hulefâsından Yahya ve İsmail ve mezbûr Yazıcı ile mahâll-i mezkûra varıp mu‘âyene eylediklerinde vech-i meşrûh üzere binâ olunduğu sûretde kimesneye zarârı olmadığını han-ı mezkûrda ve civârında olan el-Hâc Halil ve İshak Efendi ve es-Seyyid el-Hâc Mehmed ve diğer el-Hâc Mehmed ve âhar el-Hâc Mehmed ve el-Hâc Osman ve el-Hâc Ahmed ve el-Hâc Hüseyin ve Molla Mustafa ve Ali Yazıcı ve es-Seyyid Mehmed ve Süleyman Beşe ve es-Seyyid Ahmed ve Mehmed Efendi ve Molla Ali ve el-Hâc Ali ve İbrahim Beşe nâm kimesneler ihbâr ve bu sûretde binâ olunmasına rızâ dâde olduklarını mezbûr dâ‘îleri gelip inhâ eylediği ma‘lûm-ı devletleri buyruldukda fermân hazret-i veliyyü’l-emrindir. Fî 26 min-şehri Rebî‘ülevvel sene 1180.