İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 306 Hüküm no: 338 Orijinal metin no: [146-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mumi’nin kızı Zomi’ye satmış olduğu menzil hissesinin satışı geçersiz olduğundan tekrar kendi üzerine kaydedilmesi Fener kurbünde redd-i menzil Ma‘rûz, Arzuhâl eden şahsı mu‘arrefe Mumi Nasrânîye Dîvân-ı âlîlerinde ma‘kūd meclis-i şer‘-i münîrde nezâret-i dâ‘îlerinde olan evkāfdan Fenerkapısı dâhilinde Cafer Subaşı mahâllesinde vâki‘ etrâf-ı erba‘ası Dimitri ve Yani ve Memiş Çavuş menzilleri ve tarîk-i âm ile mahdûd vakıf menzilin rub‘una vâzı‘atü’l-yed olan kezâlik şahsı mu‘arrefe sadriye kızı arzuhâlde mezkûretü’l-ism Zomi nâm Nasrâniye ile terâfu‘larında vakf-ı mezkûr mütevellîyesi Hanife nâm hatun hâzır olduğu hâlde menzil-i mezkûrun rub‘u taraf-ı vakf-ı merkūmdan tasarrufumda iken altmış yedi senesi Saferi’nde kızım mezbûre beni ölünce görüp ve gözetmek şartıyla ferâğ edip lâkin kızım mezbûre şimdi beni gözetmeyip ferâğ-ı mezkûr şart-ı mezkûr ile mu‘teber olmamağla hisse-i mezkûre bâ-re’y-i mütevellî yine benim üzerime olmasını taleb ederim deyü ferâğ-ı mezkûrun minvâl-i muharrer üzere olduğunu mahâlle-i mezbûre sükkânından olup hâlleri tezkiye olunan Attâr Osman b. Yunus ve Doğramacı Ali b. Osman nâm kimesneler şehâdetleriyle isbât edip hisse-i mezkûre ferâğının adem-i i‘tibârına binâen yine müdde‘î-i mezbûre üzerine olunmak iktizâ edip ve mütevellîye-i mezbûre dahi re’y eylediği huzûr-ı âlîlerine i‘lâm olundu. Fî-selhi Rebî‘ülevvel sene [11]80.