İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 307 Hüküm no: 339 Orijinal metin no: [146-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan ve İbrahim’in gemisi ile İstanbul’dan İbrail’e gidip gelen tayfanın ücretlerini gemi reisi Aleksanderi’den tahsil eylemeleri Yeniçerilerin ücret i‘lâmı Ma‘rûz, Kapan sefînelerinden el-Hâc Hasan ve İbrahim üç direkli ta‘bîr olunur sefînesi neferlerinden arzuhâl eden Manol ve Kiryako ve Tanaş ve Yani ve diğer Yani meclis-i şer‘-i hatîrde sefîne-i mezkûrenin reisi Aleksanderi muvâcehesinde biz sefîne-i mezkûre ile İstanbul’dan İbrail’e varıp gelince sefîne-i mezkûrede altmış gün hizmet edip ve hamûlesinin fâidesinden yirmi yedi hisse i‘tibârıyla her birimize on bir guruş isâbet etmekle taleb ederiz deyü eyledikleri da‘vâları şer‘î olmayıp [147] müddet-i mezkûrede hizmetleri için ecr-i misl lâzım gelmekle reis ecr-i misilleri mukābelesinde mezbûrûndan her birine beşer buçuk guruş verip sefîne-i mezkûreye tahmîl eyledikleri eşyâ-yı ma‘lûmenin navlundan zimmetlerini ibrâ etdikde mezbûrûn dahi meblağ-ı mezkûr beşer buçuk guruş ahz u kabz edip ecr-i misillerine müte‘allıka da‘vâdan reis-i mezbûrun sefîne sâhibleri mezbûrân el-Hâc Hasan ve İbrahim’in zimmetlerini ibrâ edip kat‘-ı nizâ‘ eyledikleri bi’l-iltimâs huzûr-ı âlîlerine i‘lâm olundu. Fî-selh-i Rebî‘ülevvel sene [11]80.