İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 307 Hüküm no: 340 Orijinal metin no: [147-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed’in şahitlikleri makbul olan kimseler için kötü sözler söylemesinin kanunsuz olduğu Ma‘rûz, Sâhibe-i arzuhâl Zeliha ile mezbûr Ahmed Çarşamba günü Arz Odası’nda huzûr-ı âlîlerinde kızı mezbûre Emine tarafından vekîli olan hâlâ zevci Mehmed ile tekrâr murâfa‘alarında da‘vâlarının zabtı derkenâr olunduğu üzere mezbûr Ahmed mezbûre Emine ile nikâh beynlerinde kāim iken dîn ve îmânına şetm eylediğine şehâdet eden kimesneler için ta‘n edip yalan şâhidleri idi isbât ederim dedikde kütüb-i fıkhiyyeden Bezzâziye’de “İnne tefsîka’l-meşhûdin-leh ba‘de’l-kazâ lâ-yûcibü butlâne’l-kazâ” deyü musarraha olan müftâ-bihâ üzere mezbûr Ahmed’in ta‘dîl ve tezkiye olunup şer‘an şehâdeti makbûle olan kimesneler için ta‘n ve tefsîki hilâf-ı şer‘-i şerîf olup hükm-i şer‘-i şerîfi ibtâl îcâb etmemekle i‘lâm-ı mezkûrda olan hükm taraf-ı âlîlerinden tenfîz birle musâb ve me’cûr olup sâhibe-i arzuhâl mezbûre Zeliha’nın dahi madde-i mezkûrede alâkası olmayıp hasm-ı şer‘î olmağla gerek mezbûr Ahmed ve gerek mezbûre Zeliha husûs-ı mezkûr için bir dahi da‘vâya tasaddî etmemek üzere tenbîh olunduğu huzûr-ı âlîlerine i‘lâm olundu. Fî-selhi Rebî‘ülevvel sene 1180