İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 308 Hüküm no: 342 Orijinal metin no: [147-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gavril v. Şahbaz ile kız kardeşi Fotini’nin Kuyumcu Abraham aleyhindeki menzil davalarında anlaşma sağlanması Samatya kurbünde Hacı Hüseyin mahâllesinde vâki‘ menzilden ibrâ Ma‘rûz, Samatya kurbünde el-Hâc Hüseyin mahâllesinde mütemekkin iken on bir sene mukaddem hâlik olan Kürkçü Şahbaz v. Gavril zimmînin verese-i münhasırasından arzuhâl eden sulbî oğlu Gavril ile şahs-ı mu‘arrefe sulbiye kızı Fotini Nasrâniye meclis-i şer‘-i hatîrde mahâlle-i mezbûrede vâki‘ iki tarafdan Şiro ve Andonaki menzilleri ve iki tarafdan tarîk-i âm ile mahdûd Rum kilisesi vakfından olan menzile vâzı‘ü’l-yed olan Andon v. Yorgi tarafından vekîli Lavrendi ile vakf-ı mezkûr mütevellîsi Panayot hâzır olduğu hâlde arzuhâlde merkūmü’l-ism Kuyumcu Abraham v. Mihal muvâcehesinde menzil-i mahdûd-ı mezkûr babamız merkūm Şahbaz’ın mülkü ve ba‘de-helâkihi dört sehim i‘tibârı üzere bizim ile kız karındaşımız gāibe ani’l-meclis Zoti Nasrâniye’ye mevrûs oldukdan sonra işbu merkūm Abraham menzil-i mezkûru her kaç akçe ziyâdeye bey‘ ederse ziyâdesini bize vermek şartıyla iki bin guruş semen-i medfû‘a bizden iştirâ ve beş yüz guruşa kilise vakfı için mütevellîsi merkūm Panayot’a bey‘ ve taraf-ı vakf-ı merkūmdan isticâr ve ba‘dehû dört bin guruş bedel-i makbûz mukābelesinde bâ-ma‘rifet-i mütevellî müvekkil-i mezbûr Andon’a ferâğ edip menzil-i mezkûrun yevm-i kabzda kıymeti yedi bin beş yüz guruş olmağla kıymet-i mezkûreden hissemizi tekmîl eylesin deyü eyledikleri da‘vâlarından yüz elli guruş üzerine merkūm Abraham ile bâ-vesâtet-i Müslimîn muslihûn sulh olup ve yüz elli guruşu bi-kadri’l-hısas ahz u kabz ve menzil-i mezkûrun aynına ve kıymetine müte‘allıka âmme-i da‘vâdan gerek merkūm Abraham’ın ve gerek müvekkil-i mersûm Andon’un ve mütevellî Panayot’un zimmetlerini ibrâ-i âm ile ibrâ ve iskāt eylediklerinde merkūm Abraham dahi bedel-i merkūm mutâlebesinden mersûmân Gavril ve Fotini’nin zimmetini kezâlik ibrâ ve iskāt ve her biri ibrâyı kabûl ve kat‘-ı nizâ‘ eyledikleri mübâşiri Çavuş kulları iltimâsıyla huzûr-ı âlîlerine i‘lâm olundu. Fî 28 Ra sene 1180.