İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 310 Hüküm no: 344 Orijinal metin no: [148-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Antaron v. Yorgi’nin, Komidas v. Kasper’den kiralamış olduğu menzil hissesine ait sözleşmesini feshetmesi Kumkapı kurbünde keşf-i menzil Ma‘rûz, Sâdır olan fermân-ı âlîlerine imtisâlen kıbel-i şer‘-i şerîf-i enverden irsâl olunan müderrisîn-i kirâmdan keşif nâibimiz es-Seyyid Halil Efendi Hâssa mi‘mârlarından Hâfız İbrahim ve Hasan Halîfeler ve sâir ümenâ-i şer‘le mahmiye-i İstanbul’da Kumkapı dâhilinde Çadırcı Ahmed mahâllesinde vâki‘ Mustafa Dede Vakfı’ndan zikri âtî menzile varıp huzûr-ı müslimînde akdeylediği meclis-i hatîrde arzuhâl eden Antaron v. Yorgi, arzuhâlinde mezkûr Komidas v. Kasper muvâcehesinde işbu derûnunda akd-i meclis-i şer‘-i şerîf olunan menzil-i mezbûrdan mesfûr Komidas bâ-temessük mutasarrıf olduğu hisse-i ma‘lûmesini bin yüz yetmiş üç senesi Şa‘bân-ı şerîfi gurresinden beri ayda on ikişer buçuk guruşa bana icâr, ben dahi isticâr etmiş idim. El-hâletü hâzihi edâdan aczim olmağla işbu bin yüz seksen senesi Rebî‘u’l-evveli gāyetinden fesh-i akd-i icâre eyledim dediğini mesfûr Komidas tasdîk eylediğini mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 26 Rebî‘i’l-evvel sene 1180.