İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 310 Hüküm no: 345 Orijinal metin no: [148-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mimar Mehmed Paşa Vakfı’ndan Buğdaycılar sokağındaki çeşmenin su yollarının temizlenmesi Çardak kurbünde keşf-i tarîk-i mâ’ Ma‘rûz, Sâdır olan fermân-ı âlîlerine imtisâlen kıbel-i şer‘-i şerîfden es-Seyyid Mehmed Efendi irsâl, ol dahi Çardak kurbünde Buğdaycılar sokağında Mimar Mehmed Paşa Vakfı’ndan olan çeşmenin su yolları üzerine varıp hâlâ kal‘a binâ emîni olan el-Hâc Mehmed Ağa ve zikr olunan çeşmenin nâzırı Çardak Şorbacısı es-Seyyid Mehmed Ağa ma‘rifetleriyle rü’yet olundukda mahâll-i mezkûrdan zelzelede münhedim olan kal‘a duvarının molozlarıyla ashâb-ı arzuhâlden el-Hâc İbrahim ve Molla Mehmed ve Sabuncu Mustafa ve Ali ve diğer Mustafa ve Ömer ve zimmîlerden Yorgi ve Hıristo ve Manuk’un müstecir oldukları mahzenlerin molozları çeşmenin su yolları üzerine dökülüp mecrâyı işgāl etmekle cereyânına mâni‘ ve inkıtâ‘ına bâ‘is olduğunu ba‘de’l-mu‘âyene kal‘anın inhidâmından terâküm eden molozları emîn-i mûmâ-ileyh ve mahzenlerden ilkā olunanları mezkûr müstecirler rızâlarıyla nakil ve mahâll-i mezkûru tathîre ta‘ahhüd eyledikleri mezbûr dâ‘ileri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 28 Rebî‘ülevvel sene [11]80.