İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 311 Hüküm no: 346 Orijinal metin no: [148-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ruhsatsız olarak cam üretip insanları zarara uğratan Osman’ın camcı esnafından ihraç olunması Camcı esnâfından ihrâç Ma‘rûz, Topkapısı’nda sâkin sâhib-i arzuhâl Osman’ın hasımları mahmiye-i İslambol’da camcı esnâfının kethüdâları İslâm ve Yiğitbaşıları İbrahim dâ‘îhânemizde ihzâr etdirdikleri mezbûr Osman ile terâfu‘larında mezbûr Osman esnâfımızdan pîr ü perver usta olmayıp hâm-dest ve dolandırıcı olmağla Müslimînin yapılarından ben camcı ustasıyım ve noksân baha ile cam yaparım diyerek akçelerin alıp ve yedimizde olan fermân-ı âlîşânın mazmûnuna muhâlif kendi menzilinde destgâh ihdâs ve kalb ve redî camlar yapmağla bundan akdem altmış dokuz ve yetmiş iki senelerinde husûs-ı mezkûr için mezbûr ile murâfa‘a olup kâr ü kisbinden dûr olmamak için ustalardan birinin yanında şerîk veyâhud şâkird olmak üzere ta‘ahhüd ve nizâm verip iki kıt‘a i‘lâm dahi olmuş iken mezbûr Osman ta‘ahhüdünde sâbit [149] olmayıp hâlâ yine menzilinde hilâf-ı fermân-ı âlî destgâh ihdâs ve ibâdullahı hîle ve hud‘a ile izrâr etmekle mezbûrun hilâf-ı fermân-ı âlîşân hareketi men‘ ve bu gûne camcılık san‘atına ta‘arruz etmeyip âhar kâr ile meşgūl olmak üzere tenbîh olunmak matlûbumuzdur deyü takrîrlerine mutâbık bir kıt‘a fermân-ı âlîşân ile iki kıt‘a i‘lâm ibrâzıyla teşekkî etdiklerinde hakīkat-i hâl minvâl-i muharrer üzere olduğunu camcılar ustalarından el-Hâc Memiş ve İsmail ve Hüseyin ve el-Hâc Hasan ve el-Hâc Mehmed ve Mehmed Çelebi ve diğer Mehmed Çelebi ve Mustafa ve Ahmed ve diğer Mehmed ve es-Seyyid Ahmed ve Mahmud ve Mustafa ve es-Seyyid İbrahim ve diğer Mustafa ve İshak ve diğer İsmail ve diğer Ahmed ve diğer Mehmed ve Süleyman ve es-Seyyid Mehmed ve diğer Süleyman ve Osman ve diğer Mustafa ve diğer Ahmed ve diğer Mehmed ve diğer Ahmed ve Ali ve diğer Mustafa ve es-Seyyid Osman nâm kimesneler ihbâr etmeleriyle fermân-ı âlîşân mûcebince mezbûr Osman fî-mâ-ba‘d camcılık san‘atına ta‘arruz ile ibâdullahı ızrâr etmeyip ve bir âhar kâra iştigāl etmek üzere mezbûr Osman’a tenbîh olunduğu bi’l-iltimâs huzûr-ı âlîlerine i‘lâm olundu. Fî 2 Rebî‘ülâhir sene 1180.