İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 311 Hüküm no: 347 Orijinal metin no: [149-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yaşı küçük olduğu için mahkeme kararıyla kendisinden uzaklaştırılmış olan eşi Hafize’yi döven ve tecavüz eden Çömlekçi Mustafa’nın cezalandırılması Ta‘zîr Ma‘rûz, Takrîben on yaşında ve zâhir-i hâli mehzûle olan Hafize bt. Süleyman nâm kızı babası mezbûr Süleyman’ın izin ve rızâsıyla anası Ümmühani nâm hatun Zeyrekbaşı’nda Demirhan mahâllesinde sâkin Çömlekçi es-Seyyid Mustafa nâm kimesneye üç bin akçe mehr-i müeccel tesmiyesiyle tezvîc ve inkâh eylediği mezbûre Ümmühani ve babası mezbûr Süleyman’ın ikrârlarıyla zâhir oldukdan sonra mezbûre Ümmühani meclis-i şer‘-i şerîfde mezbûr es-Seyyid Mustafa mahzarında kızım mezbûre maslahat-ı ricâle sâliha olmadın mezbûr es-Seyyid Mustafa menzilimden cebren ahz ve menziline götürüp zifâf murâd edip lâkin mehzûle olduğundan mutîka olmamağla ifzâ eyledi deyü teşekkî etmeğin sagīre-i mezbûre meclis-i şer‘-i şerîfe ihzâr ve kābileye irâet ve müteessire olduğu müte‘ayyin olmağın mutîka olunca şer‘an tevkīf iktizâ edip lâkin anası mezbûre zât-ı zevc olmayıp me’mûne dahi olmadığından mâ‘adâ mezbûre Hafize anasından müstağnîye olup şer‘an babası imsâka kādir olmağla babası mezbûr re’yiyle mutîka olunca zevc-i mezbûr ta‘arruz etmemek şartıyla zevci mezbûrun karındaşı es-Seyyid Hüseyin zî-iyâl ve me’mûn olduğu ihbâr olunmağla yanında ikāmet etdirilip zevci mezbûr Mustafa’ya vech-i meşrûh üzere tenbîh olunmuş idi. Ba‘dehû mezbûr es-Seyyid Mustafa için mezbûre Ümmühani kızım mezbûreye yine ta‘arruz eder deyü iştikâsına binâen babası mezbûr Süleyman’ın yanında ikāmet olunmuş iken mezbûr es-Seyyid Mustafa bu esnâda yine mezbûre Hafize’ye vikā‘ murâd edip ve hilâf-ı şer‘-i şerîf sille ile darb eylediği lede’l-mürâfa‘a ikrârıyla sâbit olmağın mûcebiyle mezbûr es-Seyyid Mustafa’ya ta‘zîr lâzım geldiği bi’l-iltimâs huzûr-ı âlîlerine i‘lâm olundu. Fî 2 Rebî‘ülâhir sene 1180.