İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 312 Hüküm no: 348 Orijinal metin no: [149-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Depremde zarar gören Kalpakçılar Yolgeçen Hanı’nda keşif yapılması Keşf-i Kalpakçılar Yolgeçen Hanı Ma‘rûz, Bundan akdem sâdır olan fermân-ı âlîye imtisâlen kıbel-i şer‘den mürsel Ali Efendi ve bi’n-nefs mi‘mâr ağa kulları ve izzetlü Yeniçeri Ağası tarafından ta‘yîn olunan Yazıcı Ebubekir Efendi, Kalpakçılar kurbünde Kalpakçılar Yolgeçeni demekle ma‘rûf hana varıp keşf ve mu‘âyene eylediklerinde han-ı mezkûr bir tarafdan Sorguççular Hanı ve bir tarafdan Kalpakçılar dükkânları ve bir tarafdan Beşmalcı Yolgeçeni ve bir tarafdan tarîk-i âm ile mahdûd olup kiremid pûşîdeli yirmi altı odalı hanın fevkānîsinde etrâf duvarların mevcûd ancak kubbeleri münhedim olan yedi bâb oda ile tarîk-i âm tarafında vâki‘ kadîmî ahşabdan mebnâ üç bâb odanın dahi ba‘zı mahâlleri münhedim olmağla mârrü’z-zikr yedi bâb odadan Sorguççular Hanı tarafında vâki‘ bir bâb kule oda ile ittisâlinde dahi bir odanın kadîmî üzere kârgîr toloz ile binaya tahtında olan odaların tahammülü olmamağla kemâ-fi’l-evvel kârgîr ve mâ‘adâ beş bâb odayı dahi kârgîr toloz ile binaya tahtında olan ebniye mütehammil olmamağla harîkden masûn olacak vechile [150] kârgîr sûretde mevcûd duvarları üzerine sakfı ahşabdan kirpi saçak ile binâsına ve ahşabdan mebnâ mezkûr üç odanın dahi ba‘zı mahâlleri ta‘mîrine tenbîh olunmuş idi. Bu def‘a sâhibân-ı arzuhâl Selim ve Mehmed Ağa nâm kimesnelerin vech-i meşrûh üzere binâ olunduğu sûretde kimesneye zarârı olmadığı müte‘ayyin olmak için arzuhâlleriyle vârid-i fermân-ı âlîlerine imtisâlen kıbel-i şer‘den tekrâr Ali Efendi dâ‘îleri irsâl olunup ol dahi mi‘mâr hulefâsından ikinci Halîfe el-Hâc Mustafa ve Mimarzâde Mustafa ve mezbûr Yazıcı ile mahâll-i mezkûra varıp mu‘âyene eylediklerinde vech-i meşrûh üzere binâ olunduğu sûretde kimesneye zarârı olmadığı han-ı mezkûrda ve civârında sâkin Hancı Ahmed Ağa ve el-Hâc Ali ve Mûytâb el-Hâc Ali ve Mehmed Odabaşı ve Vekîlharç Hüseyin Çelebi ve İplikçiler kethüdâsı Mehmed Ağa ve Kavukçu el-Hâc Mustafa ve Mehmed Beşe ve Kahveci Ahmed Beşe ve Mustafa Çelebi ve İbrahim Beşe ve Mustafa Beşe ile Kılâbdâncı Rafael ve Dimitri ve Kürkçü Yanaki ve İpekçi Yorgaki ve Derzi Dimitri ve İpekçi Abraham ve Yorgaki ve Praşkova nâm kimesneler ihbâr ve bu sûretde binâ olunmasına rızâ dâde olduklarını mezbûr dâ‘îleri gelip inhâ etmeğin ma‘lûm-ı devletleri buyurdukda emr ü fermân hazret-i men-lehü’l-emrindir. Fî 29 Rebî‘ülevvel sene 1180.