İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 313 Hüküm no: 349 Orijinal metin no: [150-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Süleyman’ın İsmail b. Hüseyin aleyhindeki rüşvet davasında anlaşma sağlanması Yüz elli guruşa sulh Ma‘rûz, Vefa meydanı kurbünde Kazgancı arzuhâl eden Hasan b. Süleyman meclis-i şer‘-i hatîrde derûn-ı arzuhâlde mezkûr el-Hâc İsmail b. Hüseyin’den üç sene mukaddem bir husûs için Asesbaşı ma‘rifetiyle zindanda habsolunduğumda tahlîsim için bi-tarîkı’r-rüşve işbu meclisde hâzır Hüseyin yediyle malımdan iki yüz yetmiş guruş vermekle taleb ve da‘vâ eylediğinde, ol dahi meblağ-ı mezkûru emriyle mahâll-i ma‘lûmeye def‘ ve teslîm eyleyip ancak zimmetimde on yedi guruş kaldı deyü def‘ ve beynlerinde nizâ‘ etmeleriyle bâ-vesâtet-i Müslimîn mezbûr Hasan yüz elli guruş bedel-i makbûz mukābelesinde mezbûr el-Hâc [İsmail] ile sulh olup ziyâde yüz yirmi guruşa müte‘allıka âmme-i da‘vâdan mezbûr el-Hâc İsmail’in zimmetini ibrâ etdikde ol dahi medfû‘u olan yüz elli guruş mutâlebesinden mezbûr Hasan’ın zimmetini ibrâ ve iskāt ve her biri ibrâyı kabûl ve kat‘-ı münâza‘a eyledikleri ba‘de’t-tescîl bi’l-iltimâs huzûr-ı âlîlerine i‘lâm olundu. Fî 4 Rebî‘ülâhir sene 1180.