İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 314 Hüküm no: 351 Orijinal metin no: [151-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Efendi’nin tasarrufunda olan vakıf menzili Başbakikulu Mustafa Bey’e satması Başbâkīkulu menzili keşf Ma‘rûz, Sâdır olan fermân-ı âlîye imtisâlen Mollagürânî kurbünde vâki‘ Saliha Hatun Vakfı’ndan olup sâhibe-i arzuhâlin zevci kuzâtdan İbrahim Efendi’nin üzerinde olan menzilin makarr-ı nisvân olan mevâzi‘ine hâlâ Başbâkīkulu derûn-ı arzuhâlinde mezkûrü’l-ism Mustafa Bey kullarının sokak aşırı menzilinin ulyâ ve vüstâsında ihdâs eylediği pencerelerinden havâlesi olduğu kıbel-i şer‘-i şerîfden mürsel keşif nâibimiz es-Seyyid Halil Efendi ve Mimar hulefâsı mu‘âyene ve ihbârlarıyla müte‘ayyin olup ve mezbûr Mustafa Bey’in vekîl-i şer‘îsi el-Hâc Mustafa havâlesini def‘a ta‘ahhüd etdikden sonra mezbûr İbrahim Efendi rızâsıyla meclis-i şer‘-i şerîfe gelip menzil-i mezkûru üç bin beş yüz guruş bedel-i makbûz mukābelesinde mezbûr Mustafa Bey’e ferâğ ve tefvîz etdikde vekîl-i mezbûr dahi mezbûr Mustafa Bey tarafından vekâleten kabûl ve bu minvâl üzere vakf-ı mezkûr mütevellîsi hâzır bi’l-meclis el-Hâc Mustafa Efendi dahi bi’t-tevliye mezbûr Mustafa Bey’in tasarrufuna izin vermekle kat‘-ı münâza‘a eyledikleri mübâşiri İbrahim Çavuş kulları iltimâsıyla huzûr-ı âlîlerine i‘lâm olundu. Fî 6 Rebî‘ülâhir sene 1180.