İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 316 Hüküm no: 353 Orijinal metin no: [151-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kostani bt. Praşkova’nın İstefan v. Yorgi aleyhindeki mahzen gediği davasının ispat edememesi Topkapısı kurbünde Meyhâne gediği ne vechile zabt Topkapısı kurbünde Bâyezid Kethüdâ mahâllesinde sâkin ve arzuhâlde merkūmü’l-ism Topal Nikola nâm zimmînin zevcesi şahsı mu‘arrefe Kostani bt. Praşkova nâm Nasrâniye Saferi’l-hayrın on ikinci günü meclis-i şer‘-i şerîfde mahâlle-i mezbûrede vâki‘ ma‘lûmü’l-hudûd mahzenin gedik ta‘bîr olunur âlâtına vâzı‘ü’l-yed olan hâmil-i arzuhâl İstefan v. Yorgi muvâcehesinde âlât-ı mezkûre benim mülküm olup mezbûr İstefan’dan istidâne eylediğim altı yüz guruş deynim mukābele[sinde] bin yüz yetmiş yedi senesi Rebî‘ülevveli’nin üçüncü günü târîhiyle zevcim merkūm Topal Nikola [152] yediyle irhân ve teslîm ve deyn-i mezkûrun üç yüz guruşunu yetmiş dokuz senesi Şa‘bânı’nın onuncu günü Beyoğlu’nda Kamer Hatun mahâllesinde müstecir olduğum Sarıkçı Hasan Ağa menzilinde sâfî altmışlık teslîm eylediğimde ol dahi âlât-ı mezkûrenin yedinde rehin olup ve deyn-i mezkûrdan bâkī ancak üç yüz guruş kaldığını ikrâr u i‘tirâf etmekle hâlâ ben deyn-i bâkī üç yüz guruşu edâ ve âlât-ı mezkûreyi istirdâd ederim deyü da‘vâ ve merkūm İstefan cevâbında âlât-ı mezkûre müdde‘iye-i mezbûrenin zevci merkūm Topal Nikola’nın mülkü olmağla târîh-i mezkûrda altı yüz guruş semen-i makbûza bana bey‘ ve temlîk ve teslîm etmiş idi deyü müdde‘iye-i mezbûrenin mülkü olup deyn-i mezkûr mukābelesinde rehin vaz‘ eylediğini inkâr etmeğin müdde‘iye-i mezbûre târîh-i mezkûrdan beru müdde‘âsına şâhid tedârik ve evvelâ ikāme eylediği üç nefer kimesneler edâ-yı şehâdet edemeyip ba‘dehû ikāme eylediği Çınar’da sâkin hizmetkâr makūlesinden Mehmed ve Kamer Hatun mahâllesinden Ustaoğlu Çukadâr Mustafa nâm kimesneler ancak üç yüz guruş teslîmine edâ-yı şehâdet edip onlar dahi tezkiye esnâsında gaybet ve firâr edip ahvâlleri mechûl olmağla makbûl olmayıp ba‘dehû ikāme eylediği bir nefer zimmî iki altın alıp şehâdete geldim bu husûsun aslı bu kadar deyip ba‘dehû Beyoğlu’nda Papas Köprüsü’nde câmeşûycu demekle meşhûr kahveci Hüseyin b. Ali ile Kamer Hatun mahâllesinde sâkin Perdahtçı Serkiz v. Mardıros nâm zimmîyi ikāme, onlar dahi edâ-yı şehâdet edip lâkin merkūm Câmeşûycu Hüseyin sırren ve alenen tezkiye olundukda kizble ma‘rûf ve şehâdet-i zûr ile meşhûr olduğu ihbâr olunup ve mezbûre Kostani için eşirrâdandır deyü Topkapısı ahâlîsinden mazbûtü’l-esâmi kimesneler haber verdiklerinden mâ‘adâ merkūme Kostani husûs-ı mezkûr için bundan akdem birkaç def‘a Sadr-ı Rum Efendi hazretleri dâ‘îleri huzûrunda da‘vâ ve beyyineden âciz olup mu‘ârazadan men‘ olunduğuna mesfûr yedinde iki kıt‘a i‘lâm dahi olmağla merkūme Kostani beyyine-i âdile ikāme edememekle husûs-ı mezkûrda tezvîr fehm olunmağla beynleri bulunmağa havâle olunduğu cerîdede mazbût ve mukayyeddir. Fî 7 Rebî‘ülâhir sene 1180.