İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 317 Hüküm no: 354 Orijinal metin no: [152-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Ağa’nın, üst komşusu Agob’u depremde zarar gören menzilinin tamirinden men edemeyeceği Keşif Sancakdâr Hayreddin mahâllesinde Ma‘rûz, Sâdır olan fermân-ı âlîlerine imtisâlen savb-ı şer‘-i şerîf-i enverden irsâl olunan keşif nâibimiz es-Seyyid Halil Efendi ve Haremeyn-i muhteremeyn müfettişi Ahmed Necib Efendi dâ‘îleri tarafından mürsel Mehmed Samih Efendi ve Hâssa mi‘mârlarından Hasan ve es-Seyyid Mustafa halîfeler ve sâir ümenâ-yı şer‘le mahmiye-i İslambol’da Samatya kapısı dâhilinde Sancakdâr Hayreddin mahâllesinde vâki‘ süflâ Bâbüssa‘âde Ağası Yakub Ağa Vakfı’ndan Dergâh-ı âlî kapıcıbaşılarından Halil Ağa b. el-Hâc Ahmed tasarrufunda kâfirî kârgîr zîr-i zemîn bürüncükhâne ebniyesi ve ulvî Harbetî Mustafa Ağa nâm sâhibü’l-hayrın Fındıklı’da binâ ve icrâ eylediği çeşmesi vakfından Agob v. Asvador zimmî tasarrufunda bir bâb menzil olup sebkat eden zelzeleden inhidâma mâil mahâlleri hedm olunan ebniye arsası üzerine varıp akd-i meclis-i şer‘-i kavîm eylediklerinde Yakub Ağa Vakfı mütevellîsi Hâfız Mustafa Efendi tarafından vekîl-i müsecceli câbî-i vakıf Mehmed Arif Efendi ile Mustafa Vakfı mütevellîsi es-Seyyid Mehmed Emin Efendi hâzırân oldukları hâlde zikr olunan bir bâb münhedim menzile mutasarrıf olan mesfûr Agob zimmî tarafından vekîl olduğu Berber Veliyüddin b. Hüseyin ve Mustafa Beşe b. Abdullah şehâdetleriyle sâbit Haçador v. Avanis zimmî meclis-i ma‘kūd-ı mezkûrda mûmâ-ileyh Halil Ağa mahzarında müvekkilim mesfûr Agob zimmî menzilinin mi‘mârân-ı mezbûrân misâhaları üzere terbî‘an yüz dört buçuk zirâ‘ mahâlli kârgîr-i mezkûr ulvîde olup bi’l-vekâle binâ ve i‘âde murâd eylediğimde mûmâ-ileyh Halil Ağa hâlâ men‘ eder deyü da‘vâ ve Halil Ağa dahi cevâbında müvekkil-i mesfûrun menzilinin ol mikdârı kârgîr-i mezkûrun üzerinde olduğunu ikrâr, lâkin menzil-i mezkûrun süflünde olan kemer münhedim olmağla ben kemer-i mezkûru binâ eder isem ol dahi [153] menzilini binâ eder deyü süflünü binâdan ibâ etmekle kütüb-i fetâvâda “Tahtânîsi Zeyd’in mülkü ve fevkānîsi Amr’ın mülkü olan menzilin fevkānîsi zelzeleden münhedim olup Amr menzilini ke’l-evvel binâ ve i‘âde etmek murât etdikde Zeyd râzı olmayıp Amr’ı menzilini binâdan men‘a kādir olmaz” deyü tasrîh olunan fetvâ-yı şerîfe mûcebince mezbûr Halil Ağa süflünü binâ etmemekle mesfûru ulvini binâdan men‘a şer‘an kādir olmadığına mûmâ-ileyh Halil Ağa’ya tenbîh olunduğunu mezbûrân dâ‘îleri mahâllinde tahrîr ve gelip ümenâ-yı şer‘le inhâ eyledikleri bi’l-iltimâs huzûr-ı âlîlerine i‘lâm olundu. Fî 22 S sene [11]80.