İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 318 Hüküm no: 355 Orijinal metin no: [153-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Depremde zarar gören Yağcı Han’da ehli vukuf tarafından keşif yapılması Keşf-i Yağcılar Hanı Ma‘rûz, Bundan akdem sâdır olan fermân-ı âlîlerine imtisâlen kıbel-i şer‘-i şerîfden mürsel Ali Efendi ve mi‘mâr hulefâsı ve izzetlü Yeniçeri Ağası tarafından ta‘yîn olunan Yazıcı Ebubekir Efendi Sofçular Hanı karşısında vâki‘ Yağcı Hanı demekle ma‘rûf hana varıp keşf ve mu‘âyene eylediklerinde han-ı mezkûr bir tarafdan Tahta Han ve üç tarafdan tarîk-i âm ile mahdûd elli yedi odalı hanın ulyâsında Hadîce nâm hatun tasarrufunda ve Tahta Han tarafında sagīr bir odanın nısf tolozu ile han-ı mezbûr tarafında olan duvarının nısfı münhedim olup mevcûd tolozu ile mevcûd duvarı ve ittisâlinde olan bir odanın tolozu ve Tavukpazarı tarafında olan bir duvarı yerinden altı parmak taşra çıkıp cümlesi müşrif-i inhidâm olmağla ber-mûceb-i emr-i âlî hedmi için ashâbına tenbîh olunmuş idi. Hâlâ hedm olunmayıp alâ-hâlihi terk olunmağla bu def‘a ashâb-ı arzuhâl Zeliha ve Meryem ve civârında ve tahtında sâkin ve mütemekkin Na‘alband Mehmed ve Kebabçı Ahmed Beşe ve el-Hâc Hasan ve Hüseyin Ağa ve Süleyman [b.] es-Seyyid Salih ile Aşçı Aslan ve Berber Ariton ve Semerci Mardıros ve sâirleri hedm ile zarârları def‘ olunmak için arzuhâlleriyle vârid olan fermân-ı âlîlerine imtisâlen kıbel-i şer‘den tekrâr Ali Efendi dâ‘îleri irsâl olunup, ol dahi mi‘mâr hulefâsından Abdullah ve Mimarzâde Mustafa ve mezbûr Yazıcı ile mahâll-i mezkûra varıp mu‘âyene eylediklerinde ebniye-i mezkûre alâ-hâlihi terk olunduğu sûretde etrâfına ve mârreye hasâret olacağı müte‘ayyin olup ebniye-i mezkûre vech-i meşrûh üzere hedme muhtâc olduğunu mi‘mârân-ı mezbûrân haber verdiklerini mezbûr dâ‘îleri gelip inhâ eylediği ma‘lûm-ı devletleri buyruldukda emr ü fermân hazret-i men-lehü’l-emrindir. Fî 6 Rebî‘ülâhir sene 1180.