İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 319 Hüküm no: 356 Orijinal metin no: [153-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cağalzade Fırınının Laleli Fırını Ustası Osman’a tahsis olunması Cağalazâde Fırınının gediği bey‘ Ma‘rûz, Cağalazâde Fırını’nın gediği Atmeydanı’nda olan değirmeni ve on yedi mahâlde iskemlesiyle üç hisse i‘tibârıyla bir hissesi Fâtıma nâm hatun tasarrufunda ve iki hissesi Çukadâr Osman nâm ekmekçinin tasarrufunda iken Defterdâr-ı esbak Halîmî Paşa zamânında mîrîye olan deynini edâ edememekle Saray-ı hazret-i Sadr-ı a‘zamî ta‘yînâtından yevmî dört bin akçelik ekmek fırın-ı merkūmdan verilmek üzere bundan akdem kāime olunup ve ma‘lûm-ı hazret-i cihândârî dahi olmuş iken merkūm Çukadâr Osman mezkûr fırını yine idâre edememekle bi’l-âhire kapayıp on sekiz aydan beri nizâm ustaları ma‘rifetleriyle küşâd olmak için içine bir ekmekçi ustası vaz‘ına sa‘y-i belîğ olunmuş iken bir mu‘temed kimesne zuhûr etmemekle alâ-hâlihi terk olunup iskemle mahâlleri ve yevmiye dört bin akçe ekmek ta‘yîni mensî olmuş idi. Şimdi Lâleli Fırını ustası diğer Osman mezbûr Çukadâr Osman’ın hâlâ mîrîye deyni olan bin üç yüz on bir guruşu her ayda elli guruş verip müeccelen mukassatan edâ ve zikr olunan on yedi iskemle mahâllini tashîh ve ekmek vaz‘ ve bey‘ ve yevmiye ta‘yîni olan dört bin akçe ekmek yine Saray-ı hazret-i Sadr-ı a‘zamîye verilmek ve sülüs hisse sâhibesi mezbûreye hissesi için her mâh beşer guruş vermek şartlarıyla deyn-i mezkûr mikdârı bin üç yüz on bir guruşa kabûl ve mezkûr fırını küşâd ve tabhı nisâbında pâk ve beyaz ve münakkā ve pişkin ekmek işletmek üzere müte‘ahhid olmağla nizâmı için taraf-ı âlîlerinden istîzân olundukda Saray-ı hazret-i Sadr-ı a‘zamî’ye olan dört bin akçe ta‘yîni için ancak yevmiye ikişer bin akçelik ekmek ta‘yînine müsâ‘ade-i aliyyeleri erzânî buyrulmağla diğer Osman dahi ekmekçiler şurûtu mûcebince fırın-ı mezkûru küşâd ve idâresine nizâm ustaları kefil olmağla [154] fırın-ı mezkûr şurût-ı mezkûresiyle mezbûr diğer Osman üzerine Başmuhâsebe’ye kayd ve yedine sûret verilmek bâbında emr ü fermân hazret-i men-lehü’l-emrindir. Fî 8 Rebî‘ülâhir sene 1180.