İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 319 Hüküm no: 357 Orijinal metin no: [154-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bekir Efendi Mumhanesi gedik aletlerinde Uzun Mehmed’in alakası olmayıp Molla Osman’ın olduğu Mumhâne nizâ‘ı ne vechile zabt Arzuhâl eden el-Hâc Salih’in hasmı Derûn-ı arzuhâlde mezkûrü’l-ism Uzun Mehmed dört gün mukaddem Dîvân-ı âlîlerinde ma‘kūd meclis-i şer‘-i şerîfde mezbûr el-Hâc Salih mahzarında Yedikule’de vâki‘ kuzâtdan Bekir Efendi Mumhânesi demekle ma‘rûf ma‘lûmü’l-hudûd vakıf mumhânede ben müstecir olup ve içinde mevcûd gedik ta‘bîr olunur mumcu âlâtı mülküm iken mezbûr el-Hâc Salih mezkûr mumhâneyi mezkûr Bekir Efendi’den tefevvüz etmekle mülküm olan âlât-ı mezkûreyi bi-gayrı hakkın zabt ve beni ihrâc eyledi deyü ba‘de’d-da‘vâ ve’l-inkâr, hakīkat-i hâl esnâfından suâle havâle olunmağla Mumcular Kethüdâsı Hüseyin ve İbrahim ve yiğitbaşıları diğer İbrahim ve Bekir ve sâir ustalarından mazbutü’l-esâmi kimesneler dâ‘îhâneye ihzâr ve istifsâr olundukda mezbûr el-Hâc Salih mezkûr mumhâneyi hâzır bi’l-meclis Molla Osman nâm kimesneye yetmiş dokuz senesi Cemâziyelevveli’nde mütevellîsi ma‘rifetiyle ferâğ ve tefvîz etmekle içinde olan âlâtını dahi müdde‘î-i mezbûr Mehmed sene-i mezkûre Cemâziyelâhiresi’nin beşinci günü Davudpaşa Mahkemesi’nde bizim huzûrumuzda iki yüz guruş semen-i makbûza mezbûr Molla Osman’a bey‘ ve teslîm ve âlât-ı mezkûreye müte‘allıka da‘vâdan mezbûr Molla Osman’ın zimmetini ibrâ etmiş idi deyü takrîrlerine mutâbık bir kıt‘a hüccet ibrâz ve mezbûr Mehmed’in âlât-ı mezkûrede aslâ alâkası olmayıp mezbûr Osman’ın mülk-i müşterâsı olduğunu alâ-tarîkı’ş-şehâde her biri haber verip lâkin mezbûr Mehmed gaybet edip da‘vâya tasaddî etmediği cerîdede mastûr ve mukayyeddir. Fî 8 Rebî‘ülâhir sene 1180.