İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 324 Hüküm no: 364 Orijinal metin no: [156-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sebzeci Yano’nun, Bakkal Yani’nin dükkânında sebze satmamasına dair talebinin geçersiz olduğu Kocamustafapaşa kurbünde vâki‘ bakkāla sebzeci gediğini bey‘ Ma‘rûz, Koca Mustafa Paşa Câmi‘i kurbünde sebzeci olan David v. Kofo nâm zimmînin oğlu Yano dâ‘îhânede mahâll-i merkūmda bundan akdem bakkāl olan Yani zimmîden bakkāl olduğu dükkânda sebze bey‘ etmekle babam merkūm David yedimde olan i‘lâm mantûkunca yetmiş sekiz senesi Şevvâli’nde nısf sebzeci gediğini on bin akçeye bey‘ ve senede onar guruşa yine merkūm Yani’den isticâr eyledikde ol dahi bakkāl dükkânında sebze bey‘ etmemek üzere ta‘ahhüd etmiş iken merkūm Yani’nin yerine dükkânında bakkāl olan işbu mahâlde hâzır olan Yorgi zimmî sebze bey‘ etmekle men‘ olunsun deyü eylediği iddi‘âsına şer‘an iltifât olunmadığından mâ‘adâ bakkālların yedinde olup kırk altı senesi târîhiyle müverrah olan fermân-ı âlîşânda otuz dokuz mahâlde bakkāl olanlar sebze bey‘ edip sebzeci tâifesi mümâna‘at eylememek şurûtundan ve zikr olunan dükkân dahi mahâll-i mezkûrede dâhil olmağla merkūm Yano husûs-ı mezkûr için bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 10 Rebî‘ülâhir sene 1180.