İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 330 Hüküm no: 375 Orijinal metin no: [160-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Midilli’de öldürülen Abdurrahman için Midilli’den gönderilmiş olan paranın bezzazistana konulması Maktûl Abdurrahman’ın maddesi için Midilli’den gelen mâl bezzâzistâna vaz‘ Ma‘rûz, Midilli’de maktûl Abdurraman’ın maddesi için re‘âyâ vekîlleri temessükleriyle nâzır Hasan Ağa otuz bin guruş ve mütesellim Ömer beş bin guruş ve Süleyman Bey on dört bin guruş iddi‘â lâkin mezbûrân mütesellim Ömer ve Süleyman Bey’in müdde‘âları olan akçe nâzır Hasan Ağa’nın müdde‘âsında dâhil olduğu ihbâr olundukdan sonra re‘âyâ-yı cezîreye mürüvveten on bin guruşu tenzîl ile yirmi bin guruşu silahşor-ı hazret-i Sadr-ı a‘zamî Mehmed Ağa mübâşeretiyle tahsîl ve bu tarafa nakden poliçe tarîkiyle irsâl olundukda mezbûrân Ömer ve Süleyman Bey tenzîle râzı olmayıp meblağ-ı mezkûrdan hisselerini almamağla vilâyet vekîlleri rikâb-ı müstetâba ref-i rıkka ile tasdî‘ etdiklerinde meblağ-ı mezkûr emâneten Bezzâzistâna vaz‘ ve üç nefer mezbûrlar matlûblarını her ne vakit tenzîl ile kabûl ederlerse ma‘rifet-i şer‘le verilmek bâbında sâdır olan fermân-ı âlîşâna imtisâlen taraf-ı dâ‘îlerinden Kâtib Abid Efendi irsâl, ol dahi mübâşir-i merkūm ve kethüdâ-i hazret-i Sadr-ı a‘zam Çukadârı Mehmed ve meblağ-ı mezkûr poliçe olunan el-Hâc İsmail Ağa ve Midilli vilâyeti vekîli Monral oğlu ve Kalonya Vekîli Kostanti ve Molova vekîli Yorgaki ile Yeni Han’a varıp Yanaki nâm Sarrâf’dan meblağ-ı mezkûrdan bâkīsi üç nefer mezbûrlar ile hesâblarına mahsûb on altı bin altı yüz seksen altı guruşu ta‘dâd ve ma‘rifetleriyle dört torbaya koyup ve Bezistân’a götürüp Bezistân Kethüdâsı ve Bekçileri huzûrlarında memhûren vaz‘ eyledikleri ma‘lûm-ı devletleri buyruldukda emr ü fermân hazret-i men-lehü’l-emrindir. Fî 12 Rebî‘ülâhir sene [11]80.