İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 331 Hüküm no: 376 Orijinal metin no: [160-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice bt. Mehmed’in annesi Zeyneb aleyhindeki menzil iddiası Ne vechile zabt Zabıtdan derkenâr Sâhibe-i arzuhâl Zeyneb bt. Abdullah’ın sadriye kebîre kızı arzuhâlde mezkûre ve zâtı mu‘arrefe Hadîce bt. Yaycı Mehmed b. Ali meclis-i şer‘-i hatîrde Lâleliçeşme kurbünde Kuyumcu Bahşayiş mahâllesinde vâki‘ nezâret-i dâ‘îlerinde olan evkāfdan Şehrâde nâm hatun vakfından ve el-Hâc Mehmed nâm kimesne ferâğından bâ-ma‘rifet-i mütevellî ma‘lûmü’l-hudûd bir bâb menzile vâzı‘atü’l-yed olan anası mezbûre Zeyneb’den menzil-i mezkûr taraf-ı vakf-ı merkūmdan babam mezbûr Yaycı Mehmed’in tasarrufunda iken altmış dokuz senesinde fevt olup menzil-i mezkûr âdiyen bana intikāl etmiş iken anam mezbûre Zeyneb hâl-i suğrumda vasî olmağla mezbûr el-Hâc Mehmed’e ferâğ, ol dahi yine mezbûre Zeyneb’e fâriğ olmağla hâlâ ben menzil-i mezkûru anam mezbûreden taleb ederim deyü da‘vâ edip lâkin mezbûre Zeyneb’in yedinde olup yetmiş senesi târîhiyle müverraha hüccet mantûkunca menzil-i mezkûr muhterik olup arsa sırfe kalmağla müdde‘iye-i mezbûrenin mâlıyla binâ olunduğu sûretde mutazarrıre olup bakāsında dahi nef‘i olmamağla tâlibleri bedel-i misli mikdârı verecekleri meblağı teberru‘an verip meblağ-ı mezkûr ile infâk olunmak hakkında enfa‘ olmağla mezbûre Zeyneb Askerî kassâmından izinle bedel-i misl olan üç yüz guruşa mezbûr el-Hâc Mehmed ferâğ ve ba‘dehû kendi tefevvüz eylediği mezbûre Hadîce’nin ikrârıyla müte‘ayyin olup vech-i meşrûh üzere izn-i mütevellî ile ferâğ-ı mezkûr mu‘teber olmağla mezbûre Zeyneb’den ancak makbûzu olan bedel-i mezkûr üç yüz guruşu iktizâ etdikde onun dahi iki yüz guruşu kızım mezbûre Hadîce’nin hîn-i tezvîcinde umûr-ı cihâzına sarf etmiş idim demekle beyyineye havâle olunduğu cerîdede mazbût ve mukayyeddir. Fî 12 Rebî‘ülâhir sene [11]80. Bu minvâl üzere Hadîce’ye de i‘lâm verilmişdir.