İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 331 Hüküm no: 377 Orijinal metin no: [160-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çilingir esnafından Bedros’un kanunsuz hareketlerde bulunmayacağına dair taahhütte bulunması Çilingir esnâfı Ma‘rûz, Mahmiye-i İslambol’da Çilingir esnâfı kethüdâsı İsmail ve Mehmed ve Yahya ve Yiğitbaşıları Serkiz ve Minas ve Kazer ve Agob ve diğer Serkiz ve Abraham ve Simyon ve Bedros ve Sogaman ve sâirleri dâ‘îhânede esnâf-ı mezkûreden Bedros v. [161] Bogos zimmîden kendi hâlinde olmayıp beynimizde mer‘î olan nizâm-ı kadîmimizin ihtilâline bâdî olmağla merkūme bi’d-defa‘ât tenbîh olundukda mütenebbih olmayıp ısrâr eylediği ecilden içimizden ihrâç olunmasını iltimâs eylediğimizde, ol dahi fî-mâ-ba‘d kendi hâlinde olup nizâmımızın hilâfı harekete tasaddî etmemek üzere ta‘ahhüd ve bir dahi bu misillü hareketde olursa te’dîben küreğe vaz‘ olunmağa râzı oldu deyü merkūmûnun teşekkî ve takrîrlerini merkūm Bedros tasdîk edip ve kendi hâlinde olmak üzere nefsine yine esnâfından Serkiz v. Tonoş nâm zimmîyi kefil verip merkūmûnu te’mîn etmekle bu minvâl üzere kat‘-ı nizâ‘ eyledikleri rızâlarıyla zabt olunup huzûr-ı âlîlerine i‘lâm olundu. Fî 13 Rebî‘ülâhir sene 1180.