İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 332 Hüküm no: 378 Orijinal metin no: [161-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatıma bt. Abdullah Vakfı’ndan olan arsa ve menzilin Emine ve oğlu Ahmed Çelebi’ye icareteyn usulüyle kiralanması Rumeli kādıaskeriyle keşf-i menzil Ma‘rûz, Sâdır olan fermân-ı âlîlerine imtisâlen kıbel-i şer‘-i münîrden mürsel es-Seyyid Yusuf Efendi ve İstanbul kādısı fazîletlü efendi dâ‘îleri tarafından mürsel keşif nâibi müderrisîn-i kirâmdan es-Seyyid Halil Efendi hâssa mi‘mârlarından Ebubekir ve Ahmed nâm Halîfeler ile İslambol’da Hobyar mahâllesinde vâki‘ zikri âtî münâza‘un-fîh olan menzile varıp huzûr-ı Müslimînde ba‘de-akdi’l-meclisi’ş-şer‘î ashâb-ı hayrâtdan Fâtıma Hatun bt. Abdullah’ın vakfı mütevellîyesi sâhibe-i arzuhâl Safiye bt. Abdullah nâm Hatun’un kāimmakāmı zevci es-Seyyid Mustafa Ağa b. İbrahim meclis-i ma‘kūd-ı mezkûrda bir tarafdan vakf-ı mezbûrdan Emine Hatun <> arsası <> ve bir tarafdan Hâfız Abdullah Efendi ve Mehmed Said Efendi ve Derviş el-Hâc Mehmed menzilleri ve bir tarafdan vakf-ı mezbûrdan Emine Hatun ve Yenibahçeli diğer Emine Hatun arsaları ve bir tarafdan tarîk-i âmla mahdûd mi‘mârân-ı merkūmân misâhaları üzere tûlen otuz zirâ‘ ve arzen on bir zirâ‘ yirmi parmak bi-hesâb-ı terbî‘î üç yüz kırk yedi zirâ‘ yirmi parmak arsalı ulyâsında iki bâb oda ve iki sofa ve bir mikdâr dehliz ve kenîf ve vüstâsında bir oda ve bir gasilhâne ve bir mikdâr dehliz ve süflâsında bir matbâh ve bir kenîfi müştemil bir bâb menzile vaz‘-ı yedleri mütehakkık olan müteveffâ Çavuşzâde el-Hâc Mustafa Efendi b. Mustafa’nın zevce-i menkûha-i metrûkeleri Emine bt. Abdullah b. Abdurrahman ve sulbî oğlu Ahmed Çelebi taraflarından husûs-ı âti’z-zikrde vekîl olduğu zâtını ârifân Mehmed Efendi b. Zekeriya ve İbrahim b. Mehmed ve Ahmed b. Hasan ve Abdullah b. Mustafa şehâdetleriyle sâbit Hâkî Mustafa Efendi b. Yusuf mahzarında mahâlle-i mezbûrede vâki‘ bir tarafdan ba‘zan Osman Ağa ve ba‘zan Ömer Çavuş ve ba‘zan es-Seyyid İbrahim ve ba‘zan el-Hâc Halil Efendi ve Hasan Efendi ve ba‘zan el-Hâc Mehmed ve el-Hâc Mustafa Efendi ve ba‘zan kezâlik Hasan Efendi menzilleri ve bir tarafdan Haydar Ağa’nın vakıf odaları ve bir tarafdan müteveffâ el-Hâc Mustafa Efendi menzili ve bir tarafdan ba‘zan gallesi imama meşrûta menzil ve bahçe ve ba‘zan tarîk-i hâs ile mahdûd terbî‘an üç bin dokuz yüz altmış zirâ‘ arsa mahâlli yedimde olan işbu bir kıt‘a hüccet-i şer‘iyye mantûkunca kāimmakām-ı mütevellîsi olduğum mezbûre Fâtıma’nın vakfı olup müvekkilân-ı mezbûrânın mûrisleri mezbûr Çavuşzâde el-Hâc Mustafa Efendi hayâtında târîh-i i‘lâmdan on altı sene mukaddem vakf-ı merkūmun mütevellîsi mevâlî-i izâmdan Abdullah Efendi’nin kāimmakām olduğu hâlde arsa-i mezbûrenin üzerinde mevcûd olan vakıf ebniye-i ma‘lûmesini hedm ve arsa-i mezbûreden bâlâda misâhası zikr olunup işbu derûnunda akd-i meclis-i şer‘-i şerîf olunan terbî‘an üç yüz kırk yedi zirâ‘ yirmi parmak mahâlli fuzûlen ifrâz ve yedinde olan mâl-ı vakıf ve enkāz-ı mevcûdesiyle mahâll-i müfrez-i mezkûrun üzerine zikr olunan müştemilâtı vakıf için bir menzil binâ edip hattâ ba‘de’l-binâ hayâtında ve kemâl-i sıhhatinde arsa-i mezbûre ile işbu müştemilât ber-vech-i muharrer Fâtıma Hatun’un vakfı olduğunu ikrâr dahi etmiş iken ile’l-vefât tegallüben zabt ve ba‘de-vefâtihî müvekkilân-ı merkūmân dahi bi-gayrı hakkın vaz‘-ı yed etmeleriyle kasr-ı yedlerine tenbîh olunmak matlûbumdur deyü ba‘de’d-da‘vâ ve’l-istintâk vekîl-i mezbûr Hâkî Mustafa Efendi cevâbında arsa-i mezbûre ber-vech-i meşrûh Fâtıma Hatun’un vakfından olduğunu bi’l-vekâle ikrâr, lâkin müştemilât-ı mezbûreyi nefsi için malıyla mülkiyet üzere binâ ve zevce-i mezbûre Emine Hatun’a icâr etmiş idi deyü ber-vech-i muharrer vakfiyetini ba‘de’l-inkâr müdde‘î-i mezbûr Mustafa Ağa ber-vech-i meşrûh müdde‘âsını isbât için şâhid-i vâhid ikāme edip şâhid-i âhar ikāme üzere iken vekîl-i mezbûr Hâkî Mustafa Efendi müştemilât-ı mezkûre işbu arsa-i mezbûre ile ma‘an Fâtıma Hatun’un ber-vech-i muharrer vakfı olduğunu bi’l-vekâle dahi ikrâr u i‘tirâf etmeğin mûcebiyle müvekkilân-ı merkūmân menzil-i mezbûrdan kasr-ı yed ve kāimmakām-ı mezbûr es-Seyyid Mustafa Ağa’ya [162] teslîme vekîl-i merkūm Hâkî Mustafa Efendi’ye ba‘de’t-tenbîh vekîl-i mezbûr Mustafa Efendi menzil-i mezbûru beş yüz guruş mu‘accele ve yevmiye bir buçuk akçe icâre-i müeccele ile müvekkilesi mezbûre Emine Hatun için bi’l-vekâle taraf-ı vakıfdan isticâra tâlib ve râgıb oldukda mezkûr es-Seyyid Mustafa Ağa ber-vech-i muharrer icâreteyn-i mezbûreteyn ile vekîl-i mezkûra teslîm, ol dahi isticâr eylediğini mevlânâ-yı mezkûrân alâ-vukū‘ihî mahâllinde ketb ü tahrîr ve ma‘an ba‘s olunan ümenâ-yı şer‘le meclis-i şer‘-i şerîfe gelip vukū‘ üzere inhâ eyledikleri huzûr-ı âlîlerine i‘lâm olundu. Fî 20 Ra sene [11]80.