İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 334 Hüküm no: 379 Orijinal metin no: [162-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sava v. İsayi’nin İbrahim Efendi aleyhindeki menzil davasında anlaşma sağlanması Keşif, Çınar kurbünde Ma‘rûz, Sâdır olan fermân-ı âlîlerine imtisâlen savb-ı şer‘-i enverden irsâl olunan keşif nâibimiz es-Seyyid Halil Efendi dâ‘îleri hâssa mi‘mârlarından Hâfız İbrahim ve Hasan Halîfeler ve sâir ümenâ-yı şer‘le mahmiye-i İstanbul’da Çınar kurbünde mi‘mâr Hayreddin mahâllesinde vâki‘ bir tarafı Rukıye Hatun ve bir tarafı Molla Mustafa menzilleri ve bir tarafdan tarîk-i hâs ve bir tarafdan tarîk-i âm ile mahdûd fevkānî üç bâb oda ve sagīr kilâr ve bir mikdâr dehliz ve süflâda bir sagīr oda ve bir kenîf ve mağsel ve matbâh ve tahtında bir kepenk berber dükkânı ve bir yazıcı dükkânını müştemil arzuhâlde mezkûrü’l-ism Hâfız el-Hâc İbrahim Efendi’nin arzuhâl eden keresteci Sava v. İsayi’ye bu esnâda müceddeden binâ etdiği menzile varıp huzûr-ı Müslimînde akdeylediği meclis-i şer‘-i münîrde mesfûr Sava mezbûr İbrahim Efendi muvâcehesinde işbu derûnunda akd-i meclis-i şer‘-i kavîm olunan menzili fi’l-asl mevcûde olup iki yüz guruş takvîmiyle bi’t-terâzî hesâbıma idhâl olunan enkāz ve sâir iktizâ eden kerestem ve amelem ile şarti’r-rücû‘ emriyle müceddeden binâ ve bin yedi yüz guruş sarf etmekle meblağ-ı merkūmun dokuz yüz elli guruşunu nakden ahz ve iki yüz guruş dahi enkāz-ı mezkûre bahasından fürû-nihâde olunmağla beş yüz elli guruşu dahi rücû‘ murâd ederim deyü da‘vâ, ol dahi cevâbında müdde‘î-i mesfûrun menzil-i mezkûrun emriyle binâsına ancak dokuz yüz elli guruş sarfını tasdîk ve ziyâdeyi inkâr etmeğin her birinin taleb ve iltimâslarıyla mi‘mârân-ı merkūmân ebniye-i mevcûdeyi misâha ve tahmîn ve Ser-mi‘mârîn-i hâssa Mehmed Tahir Ağa hatemiyle mahtûm defter mantûkunca bin iki yüz otuz iki buçuk guruş ve yirmi dört akçe takvîm etmeleriyle mezbûr İbrahim Efendi edâya râzı olup lâkin merkūm Sava râzı olmamağla ziyâdeyi isbâta havâle esnâsında bâ-vesâtet-i Müslimîn bundan akdem me’hûzu olan dokuz yüz elli guruşdan mâ‘adâ yüz on üç buçuk guruş ve bir rub‘ üzerine sulh olup ve bedel-i sulh olan yüz on üç buçuk guruş ve bir rub‘u meclis-i şer‘de mezbûr İbrahim Efendi yedinden mesfûr Sava ahz u kabz edip ebniye-i mezkûreye müte‘allıka âmme-i da‘vâdan mezbûr İbrahim Efendi’nin zimmetini ibrâ ve iskāt etdikde ol dahi ibrâsını kabûl ve bu vechile kat‘-ı nizâ‘ eyledikleri huzûr-ı âlîlerine i‘lâm olundu. Fî 11 Rebî‘ülâhir sene [11]80.