İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 334 Hüküm no: 380 Orijinal metin no: [162-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm’ün Çömlekçi Mitro aleyhindeki alacak iddiasının Tekfurdağı Naibi huzurunda görülmesi Tekfurdağı tarafına havâle Ma‘rûz, Tekfurdağı’nda Hasan Efendi mahâllesinde sâkin müteveffâ Sürgücü Mustafa’nın evlâd-ı sıgārı Süleyman ve Ömer’in vasiyy-i mansûbeleri derûn-ı arzuhâlde mezkûre ve zâtı mu‘arrefe Ümmügülsüm Çarşamba günü dîvân-ı âlîlerinde ve dâ‘îhânede ma‘kūd meclis-i şer‘-i münîrde bâ-fermân-ı âlî çavuş kulları ma‘rifetiyle ihzâr etdirdiği hasmı Çömlekçi Mitro ile bi’d-defa‘ât murâfa‘alarında yetmiş dokuz senesi Muharremi gurresinde vasîsi olduğum sagīrlerin malından menzilimde merkūm Mitro’ya sâfî beyaz akçe yedi yüz guruş ikrâz eylediğimde, ol dahi iktirâz [163] ve kabz ve istihlâk etmekle bi’l-vesâye taleb ederim deyü ba‘de’d-da‘vâ ve’l-inkâr müdde‘iye-i mezbûre müdde‘âsına Tekfurdağı’nda Soğukkuyu mahâllesinde sâkin Musa b. Musa ile Tekfurdağı Ağası kapısında Yamak Mehmed b. Ali nâm kimesneyi ikāme, onlar dahi edâ-yı şehâdet etmeleriyle tezkiye olunduklarında mezbûr Musa için udûlden olduğunu bu tarafda Tekfurdağı ahâlîsinden mevcûd olanlar ihbâr edip lâkin mezbûr Mehmed mechûlü’l-ahvâl olmağla cerh olunmağın yine Tekfurdağı’nda Akçeşme mahâllesinde sâkin Yusuf Ağa Câmi‘i İmamı Mehmed Efendi b. Ahmed nâm kimesneyi ikāme, ol dahi edâ-yı şehâdet edip lâkin ahvâlini bu tarafda bilir kimesne bulunmamağla Tekfurdağı’nda mahâllinden tezkiye iktizâ edip ve mezbûr Ümmügülsüm dahi bu tarafda âhar şâhid ikāmetinden âciz olmağla husûs-ı mezkûr mahâlline havâle buyrulup Tekfurdağı nâibi huzûrunda tarafeyn gadr ve himâyeden sıyânet olunarak hak ve adâlet üzere istimâ‘ ve faysal verilmek bâbında emr ü fermân hazret-i men-lehü’l-emrindir. Fî 17 Rebî‘ülâhir sene [11]80.