İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 335 Hüküm no: 381 Orijinal metin no: [163-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alacacı Ali’nin Ayasofya’da satın almış olduğu çadırcı dükkânı gediğini Çadırcı Mehmed’e iade etmesi Dükkân-ı mezbûr harcı olmak üzere Başmuhâsebe’ye kayd Ma‘rûz, Arzuhâl eden Alacacı el-Hâc Ali Çarşamba günü arz odasında huzûr-ı âlîlerinde derûn-ı arzuhâlde mezkûr Çadırcılar Kethüdâsı Süleyman ve sâir mazbûtü’l-esâmi çadırcılardan Ayasofya Vakfı’ndan Bezistân-ı atik kurbünde çadırcı dükkânları beyninde köşede vâki‘ el-Hâc Mehmed nâm çadırcının tasarrufunda olan dükkânı bâ-ma‘rifet-i mütevellî mezbûr el-Hâc Mahmud’dan tefevvüz ve gediğini dahi alıp alaca bey‘ etmek murâd eylediğimde mâni‘ olurlar deyü teşekkî etdikde mezbûrlar dahi cevâblarında dükkân-ı merkūm fi’l-asl çadırcı dükkânı olup ve dükkânlarımız beynine sâir esnâfın duhûlü nizâm-ı kadîmimizin ve kâr u kesbimizin ihtilâline bâ‘isdir deyü nizâmları tahkīk olundukda vech-i meşrûh üzere olduğundan mâ‘adâ metâ‘larının kat‘ ve zabtında leff ve neşrinde birbirlerinin beher hâl te‘âvününe muhtâc olup beynlerine ecnebî duhûl etdiği sûretde nizâmları muhtel olacağı âşikâr olduğundan gayrı çadırcı esnâfının metâ‘ları levâzım-ı guzât-ı Müslimîn ve mühimmât-ı asâkir-i muvahhidînden olduğundan nizâm-ı kadîmleri ihtilâlden sıyânet olunup beynlerine sâir hırfetin duhûl etmemesi re’y buyrulmağla mezbûr el-Hâc Ali dahi aldığı çadırcı gediğini sâhib-i evveli mezbûr el-Hâc Mehmed’e redde râzı olup fî-mâ-ba‘d içlerine ecnebî karışmamak üzere olan işbu nizâmları düstûrü’l-amel olmak için Başmuhâsebe’ye kayd ve yedlerine tuğrâlı emr-i âlîşân ihsân buyrulmasını esnâf-ı mezkûre istid‘â eyledikleri ma‘lûm-ı devletleri buyruldukda emr ü fermân hazret-i men-lehü’l-emrindir. Fî 17 Rebî‘ülâhir sene 1180.