İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 336 Hüküm no: 382 Orijinal metin no: [163-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Alacacı esnafından Ali’nin Çadırcı esnafından Mehmed b. Hüseyin’de olan alacağının tahsili İstirdâd, 150 guruş Ma‘rûz, Alacacı esnâfından el-Hâc Ali meclis-i şer‘-i hatîrde çadırcı esnâfından el-Hâc Mehmed b. el-Hâc Hüseyin nâm kimesne mahzarında Bezistân-ı atik kurbünde Ayasofya Vakfı’ndan olan Çadırcı dükkânında mevcûd gedik ta‘bîr olunur eşyâsını bana mezbûr el-Hâc Mehmed yetmiş yedi senesinde yüz elli guruş semen-i makbûza bey‘ edip lâkin teslîm etmemekle bey‘-i mezkûru fesheylediğimiz ecilden semen-i mezkûru istirdâd ederim deyü da‘vâ ve mezbûr el-Hâc Mehmed cevâbında bey‘-i mezkûru feshini ikrâr lâkin makbûzum olan yüz elli guruşu işbu seksen senesi Muharremi’nde dükkân-ı merkūmu mezbûr el-Hâc Ali’ye ferâgatim esnâsında bedel olmak üzere makbûzum olan beş yüz elli guruşa zam ve mahsûb etmemle yedi yüz elli guruş bedel mukābelesinde ferâgat etmiş idim deyü tasaddî eylediği def‘ini dahi beyana kādir olmamağla ikrârı mûcebince yüz elli guruşun edâsıyla mezbûr el-Hâc Mehmed ilzâm olunduğu bi’l-iltimâs huzûr-ı âlîlerine i‘lâm olundu. Fî 17 Rebî‘ülâhir sene 1180.