İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 336 Hüküm no: 383 Orijinal metin no: [164-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bitpazarı yakınında depremden zarar gören ve sahipleri tarafından tamir ettirilen Yolgeçen Hanı odaları kiralarına zam yapılması Bitpazarı kurbünde Mikrasçılar üzerinde Yolgeçen Hanı’nda vâki‘ on üç odaya bi’t-terâzî beher şehr on beş para zam Ma‘rûz, Nezâret-i âlîlerinde olan evkāfdan Hoca Pîrî Vakfı’ndan Bitpazarı’nda Mikrasçılar üzerinde olan Yolgeçen Hanı’nda on üç bâb odanın sülüsânına mutasarrıf arzuhâl edenlerden sâbıkā Kozbekçisi Ali b. Osman tarafından vekîli Molla Bekir ve selâsesine mutasarrıfe Urukiye Hatun bt. Hüseyin tarafından Murad Çarşamba günü Arz Odası’nda huzûr-ı âlîlerinde Evkāf müfettişi müderrisîn-i kirâmdan Ali dâ‘îleriyle akdolunan meclis-i şer‘-i hatîrde zikr olunan odaların tabaka-i ulyâda yedi bâb odasında her şehr ikişer guruş kirâ ile müsteciren sâkinler derûn-ı arzuhâlde mezkûrü’l-ism sahtiyancı es-Seyyid Mustafa ve es-Seyyid Mahmud ve es-Seyyid İbrahim ve Hüseyin ve Dikici Süleyman ve Mehmed ile vakf-ı mezkûr mütevellîsi Hâfız İbrahim Efendi hâzır olduğu hâlde terâfu‘larında sâlifü’z-zikr yedi bâb odalar zelzeleden münhedim olup müvekkillerimiz mallarından bin guruşdan ziyâde akçe sarf edip ve şehriye ikişer guruş ecr-i misillerinden noksân olmağla tekmîl eylesinler yâhud âhir-i şehirde fesh-i icâre ile odaları tahliye ve bize teslîm olunmak üzere mezbûrûna tenbîh olunmak matlûbumuzdur deyü bi’l-vekâle da‘vâ, onlar dahi cevâblarında zikr olunan odalarda her birimiz gedik i‘tibârıyla yirmişer ve otuzar seneden beri müsteciren sâkinler olup ve icâre-i kadîmeleri ikişer guruşdan ziyâde değildir deyü nizâ‘ etmeleriyle tarafeyn terâzîye havâle olunmuş idi. Ba‘dehû müfettiş-i mûmâ-ileyh efendi dâ‘îleriyle tarafeyn dâ‘îhâneye gelip beynleri tevfîk olmağla şehriyeleri olan ikişer guruş üzerine on beş para zammıyla her biri ayda doksan beşer paraya râzılar olup isticâr ve kabûl etmeleriyle vekîleyn-i mezbûreyn dahi vech-i muharrer üzere icâr edip bu minvâl üzere kat‘-ı münâza‘a eyledikleri rızâlarıyla tescîl ve bi’l-iltimâs huzûr-ı âlîlerine i‘lâm olundu. Fî 18 Rebî‘ülâhir sene 1180.