İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 337 Hüküm no: 384 Orijinal metin no: [164-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Turfanda bt. Delot’un, Sarraf Bedros’un varisleri aleyhindeki nakit ve eşya iddiasının zaman aşımına uğraması On iki bin beş yüz guruş ve eşyâ, yirmi seneden beri terk olunan da‘vâ gayr-ı mesmû‘a Ma‘rûz, Bir sene mukaddem İzmir’de hâlik olan Markos nâm zimmînin zevcesi şahsı mu‘arrefe arzuhâl eden Turfanda bt. Delot nâm Nasrâniye işbu Rebî‘ülâhir’in beşinci Çarşamba günü arz odasında huzûr-ı âlîlerinde meclis-i şer‘-i şerîfde altmış altı senesinde Üsküdar’da Selami mahâllesinde hâlik olan Sarrâf Bedros v. Nikogos’un terekesine vaz‘-ı yed eden verese-i münhasırasından zevcesi Huri Nasrâniye tarafından vekîli İstefan ve evlâd-ı sıgārı Ovannes ve Meryem ve Marta’nın vasîleri Haçador ile kebîr oğlu Mardıros muvâcehelerinde zikr olunan Selami mahâllesinde mütemekkine olan Nazlı nâm Nasrâniye helâkinden yirmi sene mukaddem merkūm Sarrâf Bedros’a malından on iki bin beş yüz guruş nakid ile işbu yedimde olan defter mantûkunca mecmû‘u bin iki yüz elli yedi buçuk guruş kıymetli eşyâsını îdâ‘ ve teslîm edip kable’l-ahz altı sene mukaddem hâlike oldukda verâseti zevci Serkiz ile li-ebeveyn karındaşı olup babaları ismi Karabet ve dedeleri ismi Mardıros ve anaları ismi Horobsima bt. Mardıros ve maskat-ı re’sleri Eğin kazâsında Abçak karyesi olan Markos’a münhasıra olup onlar dahi eşyâ-yı mezkûreyi taleb ve da‘vâ etmeyip merkūm Serkiz dahi hâlik oldukdan sonra benim zevcim olan merkūm Markos dahi bir sene mukaddem İzmir’de hâlik olup verâseti benim ile sulbî kebîr oğlu olan hâlâ izmir’de mütemekkin diğer Serkiz’e münhasıra olmağla merkūm Sarrâf Bedos’a merkūme Nazlı’nın helâkinden yirmi sene mukaddem îdâ‘ eylediği nakd-i merkūm ile eşyâ-yı mezkûre benim ile oğlum merkūm diğer Serkiz’e mevrûs olmağla ben asâleten ve oğlum merkūm tarafından hissesini da‘vâ ve kabza vekîl olmamla vekâleten merkūm Bedros’un terekesinden taleb ederim deyü da‘vâ edip lâkin verese-i merkūme müdde‘iye-i [165] mezbûrenin verâsetini ve nakd-i merkūm eşyâ-yı mezkûreyi inkâr etmeleriyle müdde‘iye-i mezbûre evvelâ verâset-i meşrûhasına ikāme eylediği iki nefer zimmîler edâ-yı şehâdet-i şer‘iyye edemeyip cerh olunmalarıyla müddet-i mezkûreden beri şâhid-i âhar ikāmetinden âcize olup verâset vekâletini isbât eylediği sûretde dahi verâsetini iddi‘â eylediği merkūme Nazlı yirmi sene nakd-i merkūm ile eşyâ-yı mezkûreyi merkūm Sarrâf Bedros’dan iddi‘â etmeyip terk-i da‘vâ ve bilâ-özr-i şer‘î sükût eylediği müdde‘iye-i mezbûrenin ikrârıyla sâbit olmağla bu makūle yirmi sene bilâ-özr-i şer‘î terk olunan da‘vânın istimâ‘ından hükkâm memnû‘lar olmağla husûs-ı mezkûr için müdde‘iye-i mezbûre Turfanda Nasrâniye mu‘ârazadan men‘ olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 18 Rebî‘ülâhir sene [11]80.