İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 338 Hüküm no: 385 Orijinal metin no: [165-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Hasan’ın inşa ettiği menzilinin Fatıma Hatun’un menziline olan zararını gidermeye taahhütte bulunması Keşf-i menzil, der-kurb-ı Yeni Odalar der-mahalle-i Mustafa Bey Ma‘rûz, Sâdır olan [fermân-ı] âlîlerine imtisâlen savb-ı şer‘-i şerîf-i enverden irsâl olunan keşif nâibimiz müderrisîn-i kirâmdan es-Seyyid Halil Efendi dâ‘îleri hâssa mi‘mârlarından Yahya ve es-Seyyid İsmail Halîfeler ve sâir ümenâ-yı şer‘le mahmiye-i İslambol’da Yeniçeri Odalar kurbünde Mustafa Bey mahâllesinde vâki‘ arzuhâlde mezkûre Fâtıma Hatun bt. Mehmed tasarrufunda olan menzile varıp sâhibey-i arzuhâlden el-Hâc Mustafa b. Hasan’ın bu esnâda binâ ve ihdâs eylediği menzili ulyâsında vâki‘ iki bâb oda ve sofasının pencerelerinden mezbûre Fâtıma Hatun’un menzilinin yine ulyâsında vâki‘ bir bâb oda ve sofasının makarr-ı nisvân olan mevâzi‘i görünüp havâle zarârı olduğu ba‘de’l-mu‘âyene mezbûr el-Hâc Mustafa menzil-i mezkûru ile mezbûre Fâtıma ve yine arzuhâlde mezkûr Sarrâc Hüseyin Beşe nâm kimesne menzilleri beynini fâsıl kendi duvarı üzerine tuğla duvar ile havâlesi def‘a ta‘ahhüd etmeğin gerek mezbûre Fâtıma ve gerek mezbûre Hüseyin merkūm el-Hâc Mustafa’nın duvar-ı mezkûru binâsına bi-gayrı vech-i şer‘î mümâna‘at eylememek üzere kat‘-ı münâza‘a eylediklerini mezbûr dâ‘îleri mahâllinde tahrîr ve gelip inhâ eylediği bi’l-iltimâs huzûr-ı âlîlerine i‘lâm olundu. Fî 17 Rebî‘ülâhir sene 1180.