İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 339 Hüküm no: 386 Orijinal metin no: [165-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abraham’ın ev sahibi olan Kuyumçubaşı İbrahim Ağa ile olan menzil kirası ve alacak davasında anlaşma sağlanması İcâre da‘vâsından ibrâ Ma‘rûz, Arzuhâl eden Abraham zimmî meclis-i şer‘-i hatîrde derûn-ı arzuhâlde mezkûr Kuyumcubaşı İbrahim Ağa mahzarında ben Vâlide Hanı’nda mezbûr İbrahim Ağa’nın tasarrufunda olan tahtânî vakıf odalarda üçer guruş kirâ kavliyle on sene müstecir iken mezbûr İbrahim Ağa bana seni çıkarırım deyüp kirâsını artırmağla onar guruş icâre ile kabûl ve on iki sene dahi onar guruş edâ ve mezkûr odada sâkin olup ve müddet-i mezkûrede taraf-ı vakfa olan senede altışar guruş icâre-i müeccelesini dahi malımdan verip şimdi beni odadan bâ-i‘lâm-ı şer‘î fesh-i icâre edip çıkarmağla ben dahi on iki sene üçer guruşdan ziyâde olan bin sekiz guruş ile taraf-ı vakfa verdiğim altışar guruşu mezbûr İbrahim Ağa’dan taleb ederim deyü eylediği istirdâd-ı icâre da‘vâsı mesmû‘a olmayıp lâkin mezbûr İbrahim Ağa yetmiş dokuz senesinden merkūm Abraham zimmetinde kalan seksen guruş icâre da‘vâsından merkūm Abraham’ın zimmetini rızâsıyla ibrâ ve iskāt etdikde merkūm Abraham dahi ibrâsını kabûl ve bu minvâl üzere beynleri bulunup kat‘-ı nizâ‘ eyledikleri mübâşiri çavuş kulları iltimâsıyla huzûr-ı âlîlerine i‘lâm olundu. Fî 20 Rebî‘ülâhir sene 1180.