İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 345 Hüküm no: 395 Orijinal metin no: [168-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kâtib Murad Mescidi Vakfı’nın mütevellisi Hasan’ın görülen muhasebesinde vakıftan alacaklı olması Kâtib Murad Mescid-i şerîf muhâsebesi Ma‘rûz, Derûn-ı arzuhâlde mezkûr Kâtib Murad Mescid-i şerîfi Vakfı’nın muhtâr-ı mahâlleden ber-vech-i hasbî mütevellîsi el-Hâc Hasan’ın bin yüz yetmiş dokuz senesine mahsûben bir senelik muhâsebesi ahâlî-i mahâlle muvâcehelerinde rü’yet olundukda vakf-ı mezbûrun icâreteynden bir senede ancak altı buçuk guruş îrâdı hâsıl olup meblağ-ı mezkûrun üç guruşu mescid-i mezkûr imamı vazîfesine edâ olunup bâkī üç buçuk guruşu mescid-i mezkûrun sene-i mezbûrede masârıf-ı lâzımesi olan şem‘-i revgan ve revgan-ı zeyt ve buriyâ-yı sâz ve tathîr-i kaliça ve Ramazan-ı şerîfde minârede îkād-ı kanâdîl masrûfâtı ve kable’l-inhidâm duvar ta‘mîri masraflarına vefâ etmeyip hâlâ mütevelî-i mezbûr el-Hâc Hasan’ın cânib-i vakıfdan yirmi dört buçuk guruş alacağı zuhûr edip ve yetmiş sekiz senesine mahsûben mütevellî-i [169] mezbûr yedinde olan mümzâ ve mahtûm muhâsebe defteri mantûkunca kezâlik cânib-i vakıfda bi-şarti’-rücû‘ yirmi buçuk guruş alacağı olduğu lede’ş-şer‘ zâhir olup hakīkat-i hâl vech-i meşrûh üzere olduğu huzûr-ı âlîlerine i‘lâm olundu. Fî 27 Rebî‘ülâhir sene [11]80.