İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 348 Hüküm no: 401 Orijinal metin no: [171-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Divanyolu’nda depremden zarar gören Süleyman Paşa Hanı’nın tamir olunması Keşf-i Süleyman Paşa Hanı Nezâret-i hazret-i Şeyhülislâmî’de âsûde olan evkāfdan İsmihan Kaya Sultân Vakfı’ndan Divanyolu’nda vâki‘ Süleyman Paşa Hanı demekle ma‘rûf hanın zelzeleden münhedim olan mahâlleri ke’l-evvel kârgîr binâ olunmak üzere Evkāf müfettişi efendi dâ‘îleri tarafından mürsel Hayrullah Efendi ve hâssa mi‘mârlarından Mahmud ve Hâfız İbrahim ve Ubeydullah Halîfe ma‘rifetleriyle keşf ve misâha ve tahrîr eyledikleri defter hesâb olundukda cem‘an on altı bin dokuz yüz kırk üç buçuk guruş ve yirmi dokuz akçeye bâliğ olup ba‘dehû Salı günü vâki‘ olan zelzeleden dahi nice mahâlleri rahnedâr ve vâfir masârıfa dahi muhtâc olmağın vakf-ı mezbûrda hâlâ mevcûde galle olmadığından mâ‘adâ müstegallât-ı han-ı mezbûr ile Üsküdar’da Öküz Limanı nâm mahâlde kâin hâlâ Ser-etibbâ-yı hâssa efendi hazretlerinin sâhilhânelerine münhasıra ve han-ı mezbûrdan icâre-i vâhide ile müşâhereten hâsıl olan îrâd ancak mürtezika vezâifine vâfî olmağla vech-i meşrûh üzere ta‘mîre vakıfda müsâ‘ade yokdur deyü vakf-ı mezbûr mütevellîsi Hadîce Hanım’ın mübârek rikâb-ı müstetâba arzuhâli bâlâsına bu dâ‘îlerine ve evkāf müfettişi efendi dâ‘îlerine hitâben mi‘mâr ağa ma‘rifetiyle mu‘âyene ve bu makūle ebniye için verilen şurût ve nizâma tatbîk ile i‘lâm olunmak bâbında sâdır olan fermân-ı âlîye imtisâlen taraf-ı dâ‘îlerinden keşif nâibimiz es-Seyyid Halil Efendi ve evkāf müfettişi dâ‘îleri tarafından mezbûr Hayrullah Efendi hâssa mi‘mârlarından Başhalîfe ve Hâfız İbrahim ve Yusuf halîfeler ve sâir ehl-i vukūf ile han-ı mezkûra varıp vech-i meşrûh üzere han-ı mezkûrun ta‘mîre muhtâc olduğunu ba‘de’l-mu‘âyene münhedim veyâhud inhidâma mütemâil olup hedm ve tecdîdi iktizâ eden gerek bölme ve gerek etrâf duvarları kirpi saçaklı kârgîr duvar ve ba‘zı mahâlleri münşakka ve rahnedâr olup ta‘mîr kabûl eden kubbeleri dahi ke’l-evvel kârgîr kubbe ve bi’l-külliye münhedim olan on iki oda kubbeleri ve bi’l-cümle dehliz kubbeleri mahâlline ahşabdan sakf ve fi’l-asl han-ı mezkûrun üzerinde mevcûd olan ahşabdan kiremid pûşîdeli sakfı tecdîd ve binâ olunmak üzere zikr olunan mi‘mârlar ma‘rifetleriyle tekrâr keşif ve misâha ve tahmîn ve takvîm üe tahrîr eyledikleri defter dahi hesâb olundukda sekiz bin üç yüz doksan buçuk guruş otuz yedi akçeye bâliğ olup ve han-ı mezkûr civârında olup keşif esnâsında hâzır olan mazbûtü’l-esâmi kimesneler dahi han-ı mezkûr vech-i meşrûh üzere münhedim olan kubbeleri mahâlline ahşabdan kirpi saçak ile binâ olunur ise kimesneye zarârı yokdur deyü ihbâr eyledikleri imtisâlen li’l-emri’l-âlî huzûr-ı âlîlerine i‘lâm olundu. Fî 27 Rebî‘ülâhir sene 1180.