İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 349 Hüküm no: 402 Orijinal metin no: [171-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Lusik bt. Asvador ve oğlu Avanis’in menzillerini Ahmed b. Mustafa’ya satmaları Hukūk Ma‘rûz, Arzuhâl eden kahveci Ahmed b. Mustafa Çarşamba günü Arz odasında huzûr-ı âlîlerinde Mar Yakub Kilisesi ve Sulu Manastır fukarâsı vakıflarından Samatya kurbünde vâki‘ etrâf-ı erba‘ası Takohi ve Derohi Nasrâniyeler menzilleri ve Davud Ağa Vakfı olan arsa ve tarîk-i âm ile mahdûd menzilde sâkinler olan arzuhâlde mezkûr Avanis v. Mıgırdıç ve anası Lusik bt. Asvador’dan merkūm Avanis muvâcehesinde vakfeyn-i mezkûreyn mütevellîleri hâzır olduğu hâlde menzil-i mezkûrun nısfı merkūm Avanis’in ve nısf-ı şâyi‘-i âharı anası merkūme Lusik’in tasarrufunda iken on ay mukaddem bin bir guruş bedel-i makbûz mukābelesinde ferâğ-ı kat‘î ve mütevellîleri ma‘rifetleriyle bana ferâğ ve teslîm ve ba‘dehû benden her şehir onar guruşa isticâr etmekle altı aylığını merkūmân yedlerinde ahz ve dört aylık kırk dört guruş zimmetlerinde kalmağla hâlâ ben fesh-i icâre ile menzil-i mezkûrun tahliyesini ve zimmetlerinde bâkī [172] kırk dört guruş icâreyi taleb eylediğimde ta‘allül ederler deyü da‘vâ merkūm Avanis dahi cevâbında ferâğ-ı mezkûr kat‘î olmayıp bedel-i mezkûr anam mesfûre ile müdde‘î-i merkūme zimmetimizde deynimiz olmağla mukābelesinde ferâğ bi’l-vefâ tarîkiyle ferâğ edip ve müdde‘î-i merkūmun icâre nâmıyla bizden iddi‘â eylediği kırk dört guruş deyn-i merkūmun bilâ-devr murâbahasıdır deyü def‘ edip mezbûr Kahveci Ahmed ferâğ bi’l-vefâyı inkâr etmekle evvelâ menzil-i mezkûr keşf ü takvîm olunmağa havâle olunmuş idi. Ertesi gün mezbûrûnun beynleri bulunmağla mezbûr Ahmed ile merkūm Ovannes ve anası Lusik dâ‘îhâneye gelip ferâğ bi’l-vefâ olup bedel-i merkūm deyn olduğunu mezbûr Ahmed ikrâr u i‘tirâf etmekle onlar dahi târîh-i i‘lâmdan kırk bir gün tamâmına dek deyn-i merkūm bin bir guruş ile müdde‘î-i merkūmun edâsı üzere kırk dört guruş ki cem‘an bin kırk guruş edâya ta‘ahhüd ve bu vechile edâsına zikr olunan Mar Yakob Vakfı câbîsi Kirkor v. Sokyas nâm râhib bi’l-emr ve’l-kabûl kefil ve zâmin oldukdan sonra yine merkūm Avanis ve anası tarafından sâbitü’l-vekâle vekîli İskender yine dâ‘îhâneye gelip menzil-i mezkûru ferâğ-ı kat‘î ile yine mezbûr Ahmed’e ferâğ ve menzil-i mezkûru tahliye ve teslîm eylediklerini ikrâr ve mezbûr Ahmed dahi kabûl ve mütevellîleri dahi bu vechile re’y etmeleriyle kat‘-ı nizâ‘ eyledikleri mübâşiri çavuş kulları iltimâsıyla huzûr-ı âlîlerine i‘lâm olundu. Fî 29 Rebî‘ülâhir sene 1180.