İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 355 Hüküm no: 410 Orijinal metin no: [175-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi’nin, İbrahim Ağa ve Kaftani Mehmed’e satmış olduğu arsa ve köşkün teslim olunması Ma‘rûz, Kendi tarafından asıl ve hissedârı İbrahim Ağa tarafından vekîl olan sâhib-i arzuhâl Kaftânî Mehmed sâdır olan fermân-ı âlîlerine imtisâlen Haremeyn-i muhteremeyn müfettişi müderrisîn-i kirâmdan Ahmed Necib Efendi dâ‘îleriyle dâ‘îhânede akdolunan meclis-i şer‘-i şerîfe ihzâr olunan Bursa halîfesi arzuhâlde mezkûr Ahmed Efendi ile terâfu‘larında mezbûr Ahmed Efendi’nin üzerinde olan vakıf menzilden ifrâz etmek üzere mezbûrân İbrahim Ağa ve Mehmed Ağa’ya tefvîz ve ferâgat eylediği yüz otuz zirâ‘ arsa üzerinde mebnâ binâ ve köşk taksîm olunması lâzım gelmekle on gün mukaddem ma‘rifet-i şer‘-i şerîf ve mütevellîsi ve mi‘mâr halîfesi ma‘rifetleriyle taksîm olundukda zikr olunan köşk terbî‘an on bir buçuk zirâ‘ ve altı parmak mahâllin ifrâz iktizâ etmekle alâmet-i fâsıla vaz‘ıyla mezbûr Ahmed Efendi’nin sâbitetü’l-vekâle vekîli muvâcehesinde ifrâz ve müfettiş-i mûmâ-ileyh efendi dâ‘îleri i‘lâm etmiş iken mezbûr Ahmed Efendi mülzem olmayıp zevcesini taslît ve zikr olunan müfrez köşkü hedm murâd eder deyü mezkûrun ta‘addîsi men‘ birle i‘lâm-ı mezkûrun tenfîz olunmasını da‘vâ etdikde mezbûr Ahmed Efendi dahi hakīkat-i hâl minvâl-i muharrer üzere olduğunu ikrâr etmekle fermân-ı âlîşân mûcebince fî-mâ-ba‘d mahâll-i mezkûra ta‘addî etmemek üzere mezbûr efendiye tenbîh olundukda, ol dahi fî-mâ-ba‘d mahâll-i müfrez-i mezkûra ta‘arruz ta‘addî etmemek üzere ta‘ahhüd edip lâkin mezbûr Mehmed Ağa ocağımı tahrîb etmekle ondan gayrı husûs-ı mezkûr için da‘vâm yokdur deyü takrîr ve kat‘-ı nizâ‘ eyledikleri mübâşiri çavuş kulları iltimâsıyla huzûr-ı âlîlerine i‘lâm olundu. Fî 2 Ca sene [11]80.