İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 362 Hüküm no: 421 Orijinal metin no: [179-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Küçükmustafapaşa hamamcısı Molla Ali ile kadınlar kısmı kiracısı Saliha bt. Mehmed’in kira hususunda anlaşmaları Ma‘rûz, Unkapanı kurbünde sâkine arzuhâl eden Saliha bt. Mehmed meclis-i şer‘-i şerîfde Küçükmustafapaşa hamamcısı arzuhâlde mezkûr Molla Ali b. Mustafa mahzarında hamam-ı mezkûr çifte olmağla mezbûr Molla Ali nisâya mahsûs olan tarafını yetmiş dokuz senesi Şevvâli gurresinde bir sene tamâmına dek ayda doksan beşer guruşa bana icâr ve yedi ay zabt etmişken işbu Cumâdelûlâ gurresinden beni ihrâc ve âharı ikāmet etmekle üç yüz guruş zarârım vardır deyü da‘vâ, ol dahi cevâbında mezbûre Saliha gurre-i merkūmede fesh-i akd-i icâre etmiş idi, ba‘de’l-münâza‘a beynleri bulunmağla mezbûr Molla Ali hamam-ı mezkûru Receb-i şerîf gurresinden üç aylığı mu‘accel olmak üzere beş ay tamâmına dek yine mezbûre Saliha’ya icâr eyledikde ol dahi ber-vech-i muharrer isticâr ve kabûl ve gurre-i merkūmede üç aylığı mu‘accelen teslîm etmek üzere râziye olup ve zarâr-ı mezkûr da‘vâsından mezbûr Molla Ali’nin zimmetini ibrâ etdikde mezbûr Molla Ali icâre-i mezkûreden mâ‘adâ mezbûre Saliha zimmetinde aslâ hakkı olmadığını ikrâr ve kat‘-ı nizâ‘ eyledikleri mübâşiri Hasan Çavuş kulları iltimâsıyla huzûr-ı âlîlerine i‘lâm olundu. Fî 9 Ca sene 1180.