İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 362 Hüküm no: 422 Orijinal metin no: [179-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Turşucu esnafı ile bakkalların turşu satmalarına dair yönetmelik Turşucular nizâmı Ma‘rûz, Mahmiye-i İslambol’da olan turşucuların bakkāllar ile olan lahana turşusu nizâ‘ı için Çarşamba günü arz odasında huzûr-ı âlîlerinde terâfu‘larında turşucu dükkânlarına on-onbeş dükkân karîb olanları men‘ olunup ve ba‘îd olanlar ibâdullahın adem-i muzâyakaları için lahana turşusu satmadan bakkāl men‘ olunmamak bâbında lisânen sâdır olan fermân-ı âlîlerine imtisâlen turşucular ve bakkāllar dâ‘îhâneye gelip beynlerinde turşucuların râzılar oldukları vech üzere men‘ olunacakların mahâllerini ta‘yîn ve defter edip men‘ olundukdan sonra tarafeyn lahana turşusunu sıkıp ve suyunu kıyyesi vezn ve narh-ı kadîmi olan dörder akçeye bey‘ ve lâzım olduğu mikdârı sonra suyunu koyup ve suyu için ibâdullahdan başka akçe taleb etmemek ve turşucular dükkânlarına terâzî vaz‘ etmek üzere tenbîh olundukda onlar dahi vech-i muharrer üzere ibâdullaha bey‘ ve suyu için başka akçe taleb etmeyip ve terâzî vaz‘ına ta‘ahhüd edip ve eğer ta‘ahhüdleri hilâfına hareket ederler ise gereği gibi te’dîb olunmağa râzı oldukları mübâşir çavuş kulları iltimâsıyla huzûr-ı âlîlerine i‘lâm olundu. Fî 11 Ca sene 1180.