İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 363 Hüküm no: 423 Orijinal metin no: [180-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Abdullah’ın Kebapçı Ali’den taleb ettiği ulufe davasında anlaşma sağlanması Esâmî husûsu Ma‘rûz, el-Hâc İsmail b. Abdullah mahmiye-i İslambol’da meclis-i şer‘-i hatîrde Kebabçı Ali nâm kimesne mahzarında Tersâne-i âmire Kalyonları Ağalığı’ndan mütekā‘id işbu meclisde hâzır Yusuf, Büyük Gümrük’den almak üzere Bursa Mîzân-ı harîri mukāta‘ası malından olan ulûfesini işbu Süleyman nâm kimesnenin vesâtetiyle mezbûr Kebabçı Süleyman iştirâ ve bana iki yüz otuz beş guruş semen-i makbûza bey‘ ben dahi Saray-ı âmire aşçılarından Hasan nâm kimesneye bey‘ edip mezbûr Hasan dahi mezkûr ulûfeden beş senede iki yüz guruş kabz etmiş idi. Hâlâ mezbûr Yusuf dîvân-ı âlîde mezbûr Kebabçı Ali ile lede’l-murâfa‘a ulûfesini yine üzerine tevcîh etdirmekle ben dahi medfû‘um olan iki yüz otuz beş guruşu mezbûr Ali’den Mahmudpaşa Mahkemesi’nde da‘vâ ve istirdâd murâd edip i‘lâm dahi etdirmiş idim. Hâlâ meblağ-ı mezkûrun bi-tarîkı’s-sulh yüz on guruşunu mezbûr Aşçı Hasan’dan ahz u kabz edip bâkī yüz yirmi beş guruşu mezbûr Kebabçı Ali ile altmış beş guruş bedel-i makbûz mukābelesinde sulh olup ziyâde altmış guruşa müte‘allıka âmme-i da‘vâdan gerek mezbûr Kebabçı Ali’nin ve gerek mezbûr Yusuf ve Süleyman’ın zimmetlerini ibrâ-i âm ile ibrâ ve iskāt eyledim dediğini mezbûrûn tasdîk ve kat‘-ı nizâ‘ eyledikleri bi’l-iltimâs huzûr-ı âlîlerine i‘lâm olundu. Fî 6 Ca sene 1180.