İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 369 Hüküm no: 433 Orijinal metin no: [184-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ebulmevahib isimli şahsın kiracısı olduğu vakıf menzili, sahibi Saliha’ya teslim etmesi Kara İbrahim Paşa Vakfı’ndan Molla Kestel mahâllesinde vâki‘ menzil nizâ‘ı mütevellî huzûruna tevakkuf eder. Ma‘rûz, Saliha nâm hatun tarafından vech-i âtî üzere vekâleti sâbite vekîli sâhib-i arzuhâl Mustafa, Kara İbrahim Paşa Vakfı’ndan Molla Kestel mahâllesinde vâki‘ ma‘lûmü’l-hudûd menzile vâzı‘ü’l-yed ve derûn-ı arzuhâlde mezkûr Ebulmevâhib nâm kimesne ile vakf-ı mezbûr mütevellîsi Zeyneb bt. Yusuf tarafından kezâlik vekâleti sâbite vekîli Molla Feyzullah hâzır olduğu hâlde terâfu‘larında menzil-i mezkûr taraf-ı vakf-ı mezkûrdan arsa ve ebniyesiyle mezbûr Ebulmevâhib’in üzerinde iken işbu yedimde olan vakıf temessükü mantûkunca gāib ani’l-meclis İbrahim Efendi’ye mütevellîsi ma‘rifetiyle ferâğ, ol dahi müvekkilem mezbûre Saliha’ya kezâlik ferâgat etdikden sonra mezbûr Ebulmevâhib menzil-i mezkûru tahliye ve müvekkilem mezbûreden müşâhereten isticâr etmekle müvekkilem mezbûre gurre-i Cumâdelûlâ’da mezbûr ile fesh-i icâre edip menzil-i mezkûru tahliye ve müvekkilem mezbûreye teslîme müte‘ahhid iken bu vakte dek teslîm etmemekle teslîmine tenbîh olunması bi’l-vekâle matlûbumdur deyü da‘vâ ve mezbûr Ebulmevâhib cevâbında menzil-i mezkûru mezbûr İbrahim Efendi’ye ferâgat etmeyip oğlu Edib Mustafa Efendi’ye ferâgat etmiş idim deyüp lâkin mütevellî vekîli tasdîk etmeyip mezbûr İbrahim Efendi’ye ferâgat, ol dahi müvekkile-i mezbûreye ferâgat edip bu vechile [185] re’y eylediğini ikrâr etmekle mezbûr Ebulmevâhib dahi menzil-i mezkûru tahliye ve miftâhını vekîl-i mezbûr Mustafa’ya teslîm eyledikden sonra menzil-i mezkûrun binâsı bundan akdem muhterik oldukda kendi malım ile mülküm olmak üzere binâ etmiş idim deyü tasaddî eylediği da‘vâsı vekîl-i mezbûr Mustafa ile mesmû‘a olmayıp mütevellî-yi mezbûr ile murâfa‘aya tevakkuf eylediği bi’l-iltimâs huzûr-ı âlîlerine i‘lâm olundu. Fî 22 Cumâdelûlâ sene 1180.