İstanbul Mahkemesi 25 Numaralı Sicil (H. 1179-1180 / M. 1765-1767) cilt: 76, sayfa: 372 Hüküm no: 438 Orijinal metin no: [186-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Katledilen Abdullah’ın eşi Fatıma’nın, bazı şahıslar aleyhindeki katil davasının reddolunması Madrûben katlolunan el-Hâc Abdullah Ma‘rûz, Vech-i âtî üzere lede’l-keşf katîlen fevt olan el-Hâc Abdullah b. Abdülmennan nâm zencinin verâseti zevce-i menkûhası arzuhâl eden Fâtıma bt. Abdullah ile usûbet-i sebebiye cihetinden kendisini âzâd eden Musa’nın oğlu Kapıkethüdâsı Ahmed’e ale’l-inhisâr zâtı mu‘arrefe zevce-i mezbûre Fâtıma Çarşamba günü arz odasında huzûr-ı âlîlerinde ma‘kūd meclis-i şer‘-i şerîfde Silivrikapısı kurbünde Veled Karabaş mahâllesi sâkinelerinden olup kezâlik zâtları mu‘arrefe Fâtıma bt. İbrahim ve Rabia bt. Süleyman ve Âişe bt. İbrahim ve İsmihan bt. Abdullah mahzarlarında işbu seksen senesi şehr-i Rebî‘ülevveli’nin on sekizinci günü mûrisim zevcim mezbûr Zenci Abdullah’ı mahâlle-i mezbûrede tarîk-i âmda mezbûrât Fâtıma ve Rabia ve Âişe ve İsmihan’dan kimi taş ile ve kimi odun ile başına ve yüzüne ve arkasına darb ü cerh ve kara bere edip cümlesi ma‘an katletmeleriyle diyetini taleb ederim deyü ba‘de’d-da‘vâ ve’l-istintâk ve’l-inkâr müdde‘iye-i mezbûre Fâtıma müdde‘âsını beyan için bi’d-defa‘ât imhâl olunup müddet-i mezkûreden beri ikāme-i beyyine edemeyip şâhidim yokdur deyü istihlâf etmeğin mezbûrâtdan her birine yemîn teklîf olundukda onlar dahi vech-i şer‘î üzere half billâhi’l-aliyyi’l-azîm etmekle müdde‘iye-i mezbûre mu‘ârazadan men‘ olunmak iktizâ eylediği mübâşiri iltimâsıyla huzûr-ı âlîlerine i‘lâm olundu. Fî 25 min-Cumâdelûlâ sene 1180.